بلوچستان ءِ دمگ چہ گوادر ءُ تربت ءَ پاکستانی پوج ءَ شش مردم آوار جتگ ءُ بیگواہ کتگ اَنت – وھدے کہ یکے پد ءَ یل کنگ بیتگ ءُ پنچ انگت بیگواہ ءَ اِنت-
زورانسری آوار جنی ءِ نشانگ کنگ بیتگیں مردمانی پجّار داد شاہ ء ناصر، عرفان ء شیر محمد، زمان ء سپاھان، عبدالحسین ء رحمت، الطاف ء بھرام ءُ مھیم ء الی بخش نام ءَ چہ بیتگ اَنت-
زورانسری آوار جنگ بیتگیں مردمانی درگت ءَ گوشگ بیگ ءَ اِنت شانزدہ دسمبر دوھزار بیست چار ءَ پاکستانی پوج ءَ چہ تربت ءَ زمان صفیان ، عبدالحسین ء رحمت ءُ الطاف ء بھرام آوار جتگ اَنت ءُ پد الطاف ء بھرام یل کتگ بلے زمان صفیان ءُ عبدالحسین ء رحمت دوئیں تنی وھدے بیگواہ ءَ اَنت-
دگہ بیگواہ کنگ بیتگینانی تہ ءَ عرفان دوازدہ دسمبر ءَ چہ تربت سلالہ بازار ءَ آوار جتگ، وھدے کہ داد شاہ گوستگیں شپ ءَ چہ تیاب دپی شھر گوادر ءَ آوار جتگ ، ءُ مھیم الی بخش جھمنند بلنگور بُنڈی جھمنند بیست دسمبر ءَ چہ گوادر ءَ درتکگ ءُ دیم پہ دو بیست پنجاہ ءَ روگ ءَ بیتگ کہ راہ نیم ءَ پاکستانی پوج ءُ چیریں ادارھانی کارمنداں آوار جتگ ءُ بیگواہ کتگ-
زانگ بہ بیت کہ زمان ء سپاھان کہ کیچ ءِ دمگ بالگتر ءِ جھمنند اِنت، اے اولی رند نہ اِنت کہ زمان آوار جنی ءِ نشانگ کنگ بیتگ بلکیں اشی ءَ ساری ھم زمان بلوچ ءُ آئی ءِ برات ماجد بلوچ نُھ جون دوھزار بیست ءَ زورانسری آوار جنی ءِ نشانگ کنگ بیتگ اَنت شش ماہ ءَ تاں تُرندیں لَٹ کُٹانی نشانگ کتگ ءُ پد یل داتگ- اشی ءَ اَبید آ دہ فروری دوھزار بیست دو ءَ ھم چہ تربت بازار ءَ زورانسری آوار جتگ ءُ بیگواہ کتگ- نو سیمی رند اِنت کہ بیگواہ کنگ بیتگ-