بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گوشتگ کہ بلوچ زالبول ءُ انسانی ھکانی پھازادری ءِ ھساب ءَ، من یک دھکے ءَ چہ گیش زورانسری آوار جنی، بندیگانی کوش ءُ انسانی ھکانی مزنیں کچے ءَ ھلاپ ورزیانی ھلاپ ءَ زوراک آماچیں بلوچستان ءَ گوازینتگ، کہ بازیں دھکاں چہ ءَ زوراکی ءِ نشانگ تہ ءَ اِنت- منی پُرکاری یک گرانبھائیں زاتی کیمتے ءِ سر ءَ اَتکگ- من آں تُرسینگ، زلم ءُ زوراکی ءُ ناشرکاری ءِ بازیں بھتامانی دیمپانی اِنت-
آئی ءَ گْوشتگ کہ منی پت دوھزار ءُ نُھ ءَ پاکستانی چیریں ادارھانی کارمنداں زورانسری بیگواہ کتگ اَت ءُ دوھزار ءُ یازدہ آ کُشتگ – دوھزار ءُ ھپدہ ءَ منی برات ھم درکانودی ھساب ءَ آوار جتگ اَت – ھمے روچ ءَ من پیسلہ کتگ من بے توار نہ باں ءُ نانکہ منی وڑیں جنکاں بے تواری ءَ چہ دلسیاھی چست کنگ ءَ دیاں- وشبھتی ءَ چہ منی برات درتک-
آئی ءَ گْوشتگ کہ منی جُھد ءِ سوب نو منی سر ءَ تُرندی پابندی جنگ بیتگ اَنت – مئی دوھزار ءُ بیست ءُ چار ءَ ناورے ءِ روگ ءَ پد ناشرکاری ءِ کانودی ءِ رِد ءَ دروگیں پولیس کیس، یکشل ءَ دلگوشگور، ءُ منی زندمان ءَ دگہ اڑانکانی ڈرامائی ھساب ءَ گیش بیتگ اَنت- من آں ورلڈ ایکسپریشن فورم ( WEXFO) ءُ PEN ناورے ءَ بلوچستان ءَ انسانی ھکانی ھلاپ ورزیانی درگت ءَ گپ کنگ ءِ لوٹ کتگ-
ناورے ءَ منی نندگ وھد ءَ، منی رندگیری کتگ، تُرسینتگ ءُ ناورے ءِ سرڈگار ءِ سر ءَ منی اکس ءُ تامُر جوڑ کتگ ءُ پد ءَ پاکستان ءِ رسانکدر ءَ پاکستانی پوج ءَ چہ ھمگرنچیں اکاؤنٹساں چہ اے اکس ءُ تامُر شنگ بیتگ اَنت، پد ءَ منی سر ءَ سی آئی اے ایجنٹ ءُ دگہ روکپتی واکداراں چہ دیوان ءِ بھتام جتگ، یک مھکمیں پروپیگنڈہ مھمے ءِ چہ بھتام جتگ من آں پاکستان ءَ جاور نگیگ کنگ ھاتر ءَ ناورے ءَ یک ملین ڈالر رس اتگ-
آئی ءَ گْوشتگ کہ پاکستان ءَ واتر اتکگ آں منی سر ءَ ناشرکاری بھتام جتگ – اکتوبر ءَ من آں نو فلائنگ لسٹ ءَ ایر جتگ، چریشی ءَ من آں ڈیھ ءِ یل کنگ ءَ داشتگ- اے نوکیں پاپندی دو اکتوبر دوھزار ءُ بیست ءُ چار ءَ TIME میگزین ءَ وتی سدیں گیچین کتگیں راھشونانی ھساب ءَ منی پجّار ءَ پد جتگ-
ھپت اکتوبر شپ ءَ وھدے ٹائم میگزین ءِ برجم داشتگیں یک مراگشے ءِ بھر زیرگ ءِ ھاتر ءَ کراچی انٹرنیشنل ایئرپورٹ ءَ چہ نیوریاک ءَ رؤکیں بالگراب ءَ سوار ءَ بیگ ءَ بیتگ آں، گُڑا من ءَ امیگریشن ءِ واکداراں داشتگ – منی زھرشانی ءَ اَبید من ءَ ھچ وڑیں سبب نہ گوشتگ اَنت ئے گوں من ءَ بالیگراب ءِ سوار بیگ ءَ چہ مکن کنگ بیتگ- منی پاسپورٹ پچ گپتگ ءُ بالیگراب ءِ روگ ءَ پد من واتر بیتگ آں-
آئی ءَ گْوشتگ کہ منی جند ءَ تُرس راست اَنت، بلے من وتی مردمانی شرپ ءُ باندات ءِ ھاتر ءَ گھگیری کنگ ءَ مھکماں – منی جُھد پُرایمن زند گوازینگ ءِ بُنکی ھک ءِ ھاتر ءُ اگاں کانودی ھکامی بہ بیت گُڑا چیلنجانی دیم ءَ اوشتگ بیت- اشی ءِ بید، بے کانودی، تاکت رد کارمرز کنگ ، ءُ تاکتانی نیمگ ءَ چہ ڈرانڈیھ ءِ مڈیاں مچ کنگ برجاہ ءَ اِنت- ھمے سوب اِنت کہ ما بے تواریں- اتھارٹی سر ءَ جُست کنگ ءَ چہ مکن کتگ، ءُ انسانی ھکانی ءُ انساپ ءِ وکالت کنگ ءَ چہ دلپروش کنگ بیتگ-
آئی ءَ گوشتگ کہ من ءُ منی زرمبشت ءَ ھواریں مردم جُھلیں آپانی تہ ءَ اَنت- اود ءَ مارا شارکاں انگر ءَ کتگ – بلے ما زان ایں کہ اود ءَ گرانبھائیں ڈوک ھم ھست ءُ مارا آیانی گور ءَ سر بیگ ھاتر ءَ جُھلانکی ءَ روگ ھاتر ءَ جاڑیگیں- منی واستا انسانی ھکانی پُرکاریں کار ھچ ھدوھناکی نیست بلکیں یک جُھلیں زمہ واری یے – من وتی زمہ واری ءَ سرجم کنگ ھاتر ءَ جوانیں وڑے ءَ جُھد کن آں ءُ اے وڑیں پلیٹ فارم کہ WEXFO ءُ PEN ناورے مارا آ توار دے اَنت مہ مارا سک ھژدری اِنت-