تمپ : بنجل ءِ سر ءَ اُرش، ترندیں تیرگواری ءُ تراکانی توار اشکنگ بیتگ انت

بلوچستان ءِ دمگ کیچ ءِ ھند تمپ میر آباد ءَ مروچی شپ ءَ بازیں کچے ءَ سلاہ بندیں مردماں پاکستانی پوج ءِ یک بنجلے ءِ سر ءَ اُرش کتگ-

دمگی مردمانی رد ءَ ترندیں تیرگواری ءُ بازیں تراکانی توار اشکنگ بیتگ اَنت-

اُرش ءَ پاکستانی پوج ءَ جانی ءُ مالی تاوانانی چست کنگ ءِ ھال اِنت-

زانگ بہ بیت کیچ ءِ دمگ ءَ پاکستانی پوج ءِ سر ءَ بوتگیں مروچی سئیمی اُرش اِنت کہ ایشی ءَ پیش سھب ءَ کیچ ءِ ھند دشت جت بازار ءَ پاکستانی پوج ءِ کارندہ بمب تراکے ءِ نشانگ کنگ بیتگ اَنت کہ اود ءَ پرپٹاں سواریں پاکستانی پوج ءِ دو کارندہ تراک ءِ زد ءَ اتکگ ءُ مرتگ اَنت-

وئیل ءَ پد پوج ءَ دمگ انگیر کتگ ءُ پٹ ءُ پول بندات کتگ- اے اُرش ءِ زمہ واری بی ایل اے ءَ من اتگ ات-

گیش کیچ ءِ ھند زامران بارکور ءَ ھم پاکستانی پوج ءِ یک بنجلے ناشناسیں سلاہ بندیں مردماں نوکیں سلاہ ءُ تراکانی شورواں گوں نشانگ کتگ-

اُرش ءَ پوج ءَ جانی تاوانانی ھال اِنت بلے واکداراں انگت ءَ جانی ءُ مالی تاوانانی اھوال دیم ءَ نیاؤرتگ اَنت-

زانگ بہ بیت اے دمگ ءَ بلوچ سلاہ بندیں گل پرکار اَنت وھد وھد ءِ سر ءَ پوج ءَ نشانگ کنگ ءَ اَنت مروچی بیتگیں اے اُرشانی زمہ واری کس ءَ پہ وت نہ زرتگ اَنت-