روکپتی بلوچستان ءِ بنجاھی شھر زاھدان ءَ ایرانی آمیدگس ءِ پرمان ءَ یک مردمے پاھو دیگ بیتگ – کہ ایشی ءِ ھواری ءَ دگہ کس ھم پاھو دیگ بیتگ انت-
پاھو دیگ بیتگیں مردمانی پجار ستار رادوزئی ء عبدالحمید جھمنند میلک زابل، خدابخش کمبزئی ء مھمد ءُ امید حسین زئی ء نورمھمد ءِ ناماں زانگ بیتگ اَنت-
ایشانی توک ءَ حدا بخش ءُ امید ءِ پاھو ھکم دیگ ءِ نیوز پیش ءَ شنگ کنگ بیتگ ات کہ اے گوستگیں روچ ءَ ستار داروزئی ءِ ھمراھی ءَ پاھو دیگ بیتگ اَنت-
اھوالانی رد ءَ ستار ھپت سال پیش یک دگہ مردمے ءِ ھمراھی ءَ نشہ واپاری ءِ بھتام ءَ رامشار زابل ءَ گرگ بیتگ ءُ پد ءَ زاھدان ءَ آرگ بیتگ – اے مردم سَے سال ءَ پیش یل کنگ بیتگ اَنت ءُ پد ءَ یک سالے ءَ پیش آئی ءِ لوگ ءِ سر ءَ اُرش کنگ ءُ گرگ بیتگ-
اھوالانی رد ءَ ستار داروزئی ھمے سال ءِ دومی ماہ ءَ زابل ءَ چہ زاھدان ءَ آرگ بیتگ ءُ اود ءَ آئی ءِ سر ءَ پاھو ءِ سزا اتکگ ءُ آ پاھو دیگ بیتگ-
اھوالانی رد ءَ ستار ءِ کھول ءَ گڈی گندوک گوستگیں یکشمبے ءَ کتگ بیتگ- اھوالانی رد ءَ ستار داروزئی ءَ وتی جتگیں بھتام رد کتگ انت بلے آ آمیدگس ءِ دیم ءَ بے وسی ءَ ابید آئی ءِ گوانک گوشدارگ نہ بیتگ-
حدا بخش ءُ امید دو سال پیش نشہ واپاری ءَ گرگ بیتگ ءُ آیانی سر ءَ پاھو ءِ سزا اتکگ-
زانگ بہ بیت سال دوھزار ءُ بیست ءُ سَے ءَ شنگ بیتگین یک رپورٹے ءِ رد ءَ 184 زندانی بلوچ پاھو دیگ بیتگ اَنت کہ ایشانی توک ءَ 26 جتا جتائیں زنداناں، 54 زاھدان ءِ زندان ءُ 31 بیرجند ءِ زندان ءَ پاھو دیگ بیتگ اَنت ءُ چار زالبول ھم ھوار اَنت-