کلات ءَ گوستگیں روچاں کلات ءَ جنگ ءِ وھد ءَ بلوچ لبریشن آرمی ءِ فتح اسکواڈ ءِ نمیران بیتگیں باسک شاھزیب ستاکزئی ءِ لاش ءِ دیم دیگ واکداراں انکاری کتگ-
شاھزیب ءِ گوھار ءَ سوشل میڈیا ءِ سر ءَ ویڈیو کلوہ ءِ تہ ءَ گْوشتگ کہ آ وتی برات ءِ لاش ءِ ودار ءَ آں بلے واکداراں تاں انوگ ءَ لاش ءِ دیم دیگ ءَ چہ انکار کتگ۔
شاھزیب ءِ گوھار ءَ گیش گْوشتگ کہ وھدے آ وتی برات ءِ لاش ءِ گرگ ءِ ھاترا سول نادراھجاہ ءَ سر بوتگ گڑا نادراھجاہ ءِ کارمستراں چہ آئی ءَ لوٹ کت کہ آ سی ٹی ڈی ءِ واکدارانی گور ءَ بہ روت۔ اود ءَ روگ ءَ آئی ءَ را اود ءَ شور دیگ بیتگ کہ آ کلات ءَ آمیدگس ءَ بہ روت اِنت-
آئی ءَ گْوشتگ کہ من ھم آمیدگس ءَ شتگ آں بلے سی ٹی ڈی ءُ نادراھجاہ ءِ کارمستر انگت ءَ لاش ءِ دیم دیگ ءَ چہ انکار کنگ ءَ اَنت۔
شاھزیب ءِ گوھار ءَ گوں بلوچ سیاسی ءُ انسانی ھکانی باسکاں دزبندی کتگ کہ باندا سھب ءَ پد ءَ نادراھجاہ ءَ بیا اَنت ءُ بلوچ ھمدرد ھم گوں ایشاں بیا اَنت دانکہ آیاں وتی برات ءِ لاش دست بہ کپ ایت۔
زانگ بہ بیت کہ بلوچستان ءَ باز براں نادراھجاھانی کارمستر پاکستانی لشکر ءِ پرمان ءِ پد ءَ بلوچ آجوئی لوٹوکیں مردمانی لاشاں دست دیگ ءَ چہ انکار کتگ بیتگ انت ءُ اے میان ءَ سیاد ءُ وارساں وڑ وڑیں کاگداں دستھت کنائینگ بیتگ انت۔ واکداراں رند ءَ اے دسھتی آجوئی لوٹوکیں ءُ سیاسی دائرہ ءِ ھلاپ ءَ پندل سازی ءِ دروشم ءَ کارمرز کنگ ءَ اَنت۔