مند : لوگانی سر ءَ پوج دستیگ کنگ ھلاپ ءَ زھرشانی برجاہ، سیمینار اڑ دیگ بیتگ

کیچ ءِ دمگ مند مھیر ءَ پاکستانی پوج ءَ لوگانی سر ءَ دستیگ کنگ ھلاپ ءَ نندانک برجاہ ءَ اِنت، بلوچ وومن فورم ءِ سیمینار اڑ دیگ بیتگ-

بلوچستان ءِ دمگ کیچ ءِ ھند مھیر ءَ پاکستانی پوج ءِ نیمگ ءَ چہ لوگانی سر ءَ دستیگ کنگ ھلاپ ءَ برجاھیں نندانک ءَ مروچی یازدھمی روچ اِنت کھول ءِ گْوشگ اِنت کہ فرنٹیئر کور ( ایف سی) ءَ گوستگیں پنچ سال ءَ چہ آیانی لوگانی سر ءَ دستیگ کنگ کوھانی ٹُلّ ءَ چوکی جوڑ کتگ، چریشی ءَ دمگی آباد یکشل ءَ بے پھازی دیمپان اَنت-

نندانک ءِ ھند سر ءَ بلوچ وومن فورم ءِ نیمگ ءَ اڑ دیگ بیتگیں مروچگیں سیمینار ءَ برجم بیتگ کہ آئی ءِ سرھال ” ریاستی زوراکی ءُ راج ءِ زمہ واری ” بیتگ-

سیمینار ءَ بلوچ ویمن فورم ءِ ڈاکٹر شلی بلوچ ءَ ھوار دگہ ترانکاراں مردماں گوں تران کتگ ءُ مزنیں کچے ءَ مردماں سیمینار ءَ بھرزرتگ ءُ وتی یکجاھی درشان اِتگ-

مند ءِ زھرشانی کنوکاں بھتام جتگ کہ وھدے آ چہ بلوچستان ءَ درانڈیھ ءَ پہ کار نیئت ءَ شتگ اَنت گُڑا آیانی ساڑی نہ بیگ ءَ پاکستانی پوج ءَ آیانی لوگ دستیگ کتگ اَنت-

آیانی گوشگ اِنت کہ پوج نیمگ ءَ چہ دمگی آبادی میان ءَ بُنجل جوڑ کنگ آیانی جان ءُ مال ءَ ھترہ ھست-

مند ءِ سیاسی چاگردی گلاں گْوشتگ کہ پوج ءَ پہ زور انسانی آبادی ءِ تہ ءَ چوکی جوڑ کتگ دانکہ اُرش وھد ءَ شھریاں اسپر ءِ دروشم ءَ کارمرز کت بہ کنت ءُ اُرش ءَ لس مردمانی بیرانی ءِ بھتام ءَ بلوچ سلاہ بندیں ٹولیانی سر ءُ جنگ ءُ ریاستی پلامرزی زرت بہ کنت-

دیمتر ءَ بلوچ وومن فورم اے درگت ءَ رسانکدر ءَ ھم یک مھمے بندات کتگ، آئی ءِ تہ ءَ لوگانی دستیگ کنگ ھلاپ ءَ ” ایکس ” سر ءَ کلوہ ءُ پتانکانی سر ءَ سرپدی دیگ بیگ ءَ اِنت-