بیگواھیں نودربر سھیل بلوچ ءُ فصیح بلوچ ءِ زورانسری آوار جنی ءَ سے سال سرجم بیگ ءَ بلوچ اسٹوڈنٹس ایکشن کمیٹی ءِ نیمگ ءَ چہ تربت ءَ عطا شاد ڈگری ءَ چہ شھید فدا چوک ءَ تاں روانک کش اِتگ چریشی ءَ جنک ءُ بچکیں نودربرانی مزنیں کچے ءَ بھر زرتگ-
روانک ءَ ھواریں مردماں کالج دگ ءَ چہ تھرمامیٹر چوک ءَ تاں مارچ کتگ ءُ اود ءَ چہ شھید فدا چوک ءَ سر بیتگ نندانک داتگ اود ءَ بلوچ یکجھتی کمیٹی ءِ بُنجاھی راھشون صبغت اللہ شاہ جی ءُ بساک ءِ چیئرمین شبیر بلوچ ءَ ھوار بیگواھیں مردمانی کھول ءِ باسکاں تران کتگ-
زھرشانی ءِ تران کنان ءَ ترانکاراں گوشتگ کہ فصیح ءُ سمیع بلوچ دو نومبر ءِ شپ ءَ بلوچستان شھدربرجاہ ءِ ھاسٹل ءَ چہ آوار جتگ ءُ بیگواہ کتگ اَنت کہ آیانی یل کنائینگ ھاتر ءَ نودربر ءُ کھول ءَ باز رند ءَ پُرایمنیں زھرشانی کتگ بلے انگت یل کنائینگ جُھد کنگ بیگ ءَ نہ اِنت-
آئی ءَ گْوشتگ کہ گوستگیں شپ ءَ چہ اسلام آباد ءَ دہ نودربر زورانسری آوار جنی ءِ نشانگ کتگ اَنت اے گپ ءِ درشان اِنت کہ بلوچ نودربر ڈیھ ءِ کجام کُنڈ ءَ ھم مُھر نہ اَنت-
آئی ءَ گوشتگ کہ فصیح ءُ سھیل بلوچ ءَ ھوار چہ اسلام آباد ءَ زورانسری بیگواہ کنگ بیتگیں نودربرانی یل کنائینگ لوٹ کتگ-