بی ایل اے ءِ آفیسراں آوار جنگ ءِ چن ءُ لانچ سرجم کتگ – بلوچستان پولیس

بلوچستان پولیس ءَ یک درشانے شنگ کتگ گْوشتگ کہ پولیس آفیسراں ھال داتگ کہ بی ایل اے گورنمنٹ آفیسراں آوار جنگ ءِ چن ءُ لانچ کنگ بوگ ءَ اِنت-

شنگ کتگیں درشان رِد ءَ بلوچستان ءِ دمگ چہ پنجگور، کیچ ءُ آواران ءَ گمانی ءَ ھساب ءَ ڈی پی او، ڈی سی یا کہ اے سی وڑیں آفیسراں آوار جت کن اَنت-

پولیس رِد ءَ بی ایل اے ءَ وتی چن ءُ لانچ سرجم کتگ – وھدے کہ پولیس گوشگ اِنت اے چن ءُ لانچ بی ایل اے ءِ سروک بشیر زیب نیمگ ءَ چہ کنگ بیتگ دانکہ آ وتی برات زھیر بلوچ ءَ یل کنائنت بکنت-

زانگ بہ بیت کہ بی ایل اے ءِ سروک بشیر زیب ءِ برات زھیر بلوچ بیست ھپت جون ءَ ساھت دو ءِ وھد ءَ وتی کارگس ءَ جی پی او شال ءَ برجاہ زرغون دگ ءَ چہ وتی لوگ کلی بنگلزئی سریاب دگ ءِ واستا درتکگ ءُ لوگ ءَ سر بیگ ءَ ساری آ بیگواہ کنگ بیتگ-

زھیر بلوچ ءِ یل کنائینگ ھاتر ءَ کھول نیمگ ءَ چہ زھرشانی نندانک دیگ بیتگ وھدے کہ گپ دیوان ءَ واکدار ءِ دلجمی دیگ ءَ اَبید آیل کنگ نہ بیتگ-