ھاران : زورانسری آوار جنیانی ھلاپ ءَ کھول نندانک برجاہ ءَ اِنت

چہ ھاران ءَ زورانسری آوار جنی ءِ نشانگ کنگ بیتگیں مردمانی کھول ءَ ھاران ریڈزون ءَ نندانک ءِ داتگ

گیشیں ھالانی رِد ءَ چہ ھاران ءَ زورانسری آوار جنی ءِ نشانگ کنگ بیتگیں عبیداللہ تکاپی ءَ ھوار دگہ بیگواھیں مردمانی کھول نندانک ءَ مروچی ھم ھاران ریڈزون ءَ برجاہ ءَ اِنت، زھرشانی وتی بیگواھیں دوستناکانی یل کنائینگ لوٹ کتگ-

ھاران ءَ بیگواھیں مردمانی کھول نندانک ءَ بلوچ یکجھتی کمیٹی باسک ھم ھوار بیتگ اَنت-

بلوچ یکجھتی کمیٹی ءِ نندانک ءَ نشتگیں عبیدتگاپی ءِ کھول ھمراھی ءَ پریس کانفرنس کنان ءَ گْوشتگ کہ دہ روچاں چہ عبیداللہ تگاپی پاکستانی پوج ءَ چہ بازار ءَ درستانی دیم ءَ آوار جتگ ءُ برتگ کہ انگت دیم ءَ آرگ نہ بیتگ-

اے درگت ءَ عبیداللہ تکاپی ءِ کھول ءَ گوشتگ کہ مئے پُرایمن زھرشانی ءَ ھوار بلوچ یکجھتی کمیٹی ءِ باسکاں ءُ نودربر راھشوناں عزیز اکرم، آصف نور ءُ مظفر بلوچ ءِ ھلاپ ءَ پولیس ءَ دروگیں ایف آئی آر نکش کنگ بیتگ-

کھول ءَ گوشتگ کہ اگاں دو روچ ءَ تاں بیگواھیں عبید تگاپی دیم ءَ آرگ نہ بیت ءُ نندانک ءَ نشتگیں مردمانی ایف آئی آر ھلاس نہ کت اَنت گُڑا ما نودربر ءُ بی وائی سی گوم ءَ ھواری ءَ تُرندیں زھرشانی کن ایں ءُ آئی ءِ سرجمیں زمہ واری ھاران انتزامیہ سر ءَ بیت-