نوشکی، تربت: دگہ 9 کس بیگواہ، یک مردمے یل بیتگ

بلوچستان ءِ دمگ نوشکی ءُ تربت ءَ نُھ کس پاکستانی پوج ءَ آوار جتگ ءُ بیگواہ کرتگ اَنت ءُ کراچی ءَ گرگ بیتگیں یک مردمے یل بیتگ-

گیشیں اھوالانی رد ءَ اَچ نوشکی ءَ پاکستانی پوج ءَ نُھ مردم آوار جنگ ءَ پد بیگواہ کتگ اَنت-

بلوچستان ءَ زورانسری بیگواھیانی درچ یکشل ءَ برجاہ اَنت- چہ نوشکی ءَ اھوال اَنگ کہ پاکستانی پوج ءَ نوشکی ءِ ھند تاڑیز ءُ بدل کاریز ءَ دو جتا جتائیں جاھاں چھاپہ جتگ ءُ نُھ کس آوار جتگ ءُ برتگ اَنت-

نوشکی ءَ بیگواھی ءِ وئیل ھشت ءُ نُھ اکتوبر ءَ پیش اتکگ اَنت-

پاکستانی پوج ءِ دست ءَ آوار جنگ بیتگیں مردمانی پجار ماسٹر فرید احمد ولد حاجی دولت خان بادینی، عبد المالک ولد حاجی کرم خان، ممتاز بلوچ ولد حاجی امان اللہ، اقبال بلوچ ولد حاجی امان اللہ، حبیب بلوچ ولد علی دوست، شریف جان ولد پراموس خان، شاہ سلیم ولد حاجی فاضل خان، زھور جان ولد حاجی فاضل خان اور اسفند بلوچ ولد نجیب اللہ ءِ ناماں زانگ بیتگ-

اے گرگ بیتگیں اھوالانی ھال دمگی مردماں دی بلوچستان پوسٹ ءَ سر کرتگ اَنت-

ھمے ڈول ءَ اَچ تربت کیچ ءَ پاکستانی پوج ءَ کلات ءِ جھمنندے ورنایے آوار جتگ ءُ برتگ-

اھوالانی رد ءَ یازدہ اکتوبر ءِ نیمروچ ءَ ساھت یک ءُ نیم ءَ کلات ءِ جھمنند عبدالمالک ء مھمد یوسف چہ تربت کیچ ءَ سی ٹی ڈی ءُ ایف سی ءَ آوار جتگ ءُ بیگواہ کرتگ-

کھول ءَ گوشتگ دراھیں انسان دوستیں گلاں گوں دزبندی انت کہ

عبدالمالک ءِ واستا توار چِست بہ کن اَنت-

ھمے ڈول ءَ اچ کراچی ءَ گوستگیں روچاں پاکستانی پوج ءِ دست ءَ بیگواہ بیتگیں شعیب بلوچ جھمنند پسنی یل کنگ بیتگ-

زانگ بیت شعیب دگہ ھشت نودربرانی زہیر شوکت جھمنند کیچ مند، بیبگر امیر جھمنند وشبود پنجگور، اشفاق خالقداد جھمنند نال خضدار، شہزاد خالد جھمنند نال خضدار، کمبر علی جھمنند نال خضدار ، حنیف بدل جھمنند اورماڑہ، اور سعید اللہ جھمنند گڈانی ءِ ناماں زانگ بیتگ اَنت-