پہ من تھنا بلوچستان
نبشتہ کار: کوھسار قندیل
دی بلوچستان پوسٹ
من مدام وتی ھیالانی بُجیگ ءَ کہ سپر کناں رنگ رنگین چُولان گوں ھم نیاد باں۔ کدی گُوست ءِ یات چاپ جنّان ءُ منی ٹپانی کُدینگ ءَ کایاں ءُ کدی کلمانٹیں زھیر سرَ ءِ سَریگ ءَ دَور دے اَنت ءُ مُوتک کن اَنت۔من ننداں ءُ بس ندارہ چاراں-
گُوستگیں یات مدام پہ منی دجگ ءَ ساڑی اَنت۔ من مدام جھد کُتگ کہ ھمے یاتاں چادر ءِ لمب ءَ بہ بنداں ءُ تیاب ءِ چولاں گوں راھی بہ کناں ۔بلے یات منی زند ءِ بھر اَنت ،ھمی یات من ءَ اگاں دمان ءِ گیمرین انت گڑا زندگ ھم من ءَ ھمے یات ءَ کُتگ۔ایشاں گوں سیادے منی ھون ءِ سیادی اِنت ۔
من ءَ گوں منی یات ءَ مھر پَمیشکا گیش ِانت کہ منی یات من ءَ گوں منی زمین ءَ نزدیک کن اَنت۔منی یاتانی وشتریں بھر گوں زمین ءَ بندوک اَنت،کہ اود ءَ من وت ءَ گوں دوچار کپاں۔ اود ءَ من وتی شھیدانی واھگاں پیلو بوگ ءَ گنداں-
برے برے من یاتانی انچیً دیاری ءَ سر باں تا گنداں منی چمانی دیم ےَ رپتگیں دُرستیں شھیدانی واھگ پیلو بوتگ اَنت۔شھید دُرست سالونک اَنت ،ھر یکے ءِ وتی دست ءِ ھِنیاں پیشدارن ءُ بچکندان اِنت۔ھون ءِ کِشتگیں دُرست تُوم پھل ءُ گلاب بُوتگ اَنت،ءُ مرُگ چاریں نیمگاں ھمے پُلان تواب کنگ ءَ اَنت۔
ھمے دمان ءَ گنداں تہ ماھو ءُ میرو گوں شاتکامی ءَ شارُل ءِ گُشان ءِ لَمب گِپتگ ءُ لیب کنگ ءَ اَنت۔ سمّو ءَ ھم ریھان ءِ دست گِپتگ ءُ کَور ءِ لمب ءَ نیشتگ ءُ دویں مھر ءِ توابیں کسّھاں درشان کنگ ءَ اَنت۔ سر بلند دور گوں شئے مرید ءَ مسکرائی کنگ ءَ اِنت ءُ گُشگ ءَ اِنت کہ ! پُلو چوں گندے مئے بدن ءِ ٹُکران چی زیبا بُتگیں بلوچستان ءَ۔ شئے ٹھک دنت ءُ سربلند ءِ پیشانی ءَ چُک ایت ءُ دویں گُلائیش بنت۔ چم کہ گوں بلوچ ءِ تُنیگیں زِر ءَ کپ انت ھمے گنداں تاں زِرّ ءِ دیم ءَ بلائیں آسے جمبور اِنت ءُ ورنایانی مُچی یے نِیشتگ ءُ شَیر گُوشدارگ ءَ اَنت۔ھُدا دوست گوں بھشت رنگیں کندگاں یک شَیرء وان ایت ءُ زِرپھاز دُرست چاپ جن اَنت ۔زِر ءِ چُول گوں ھمئے بچکنداں مست بنت ءُ وتی زیبای ءَ جھان ءِ چاریں نیمگاں شینگین اَنت۔ برے برے کہ سنگراں نیشتگیں آسِن بالادانی ھیال کیت گڑا گِنداں تا بولان ءِ سُرمگین کوھانی سر ٹُل ءَ استاد اسلم گوں وتی کُنگراں انگت سنگر گپتگ ءُ بدین ھُکاں بیھار دیگ ءَ اِنت کہ بلوچ ءِ گلزمین انگت اسلم ءِ چمانی دید اِنت ءُ کس اسلم ءِ زمین ءَ پہ ھلو ھالو بُرت نہ کنت۔
ھر نیمگ ءَ کہ من یاتانی تاک ءَ لیٹ دیاں تاں گنداں بس شھیدانی سرجم بوتگین وھگ ءُ آھانی کندگ ءُ ٹھکانی توار ٰاِنت ۔ باز رنداں کہ ھاموشی ءَ گوں ھم نیاد با گڑا ھیالان گوں سیاھجی ءِ کوھاں ڈِیک دیاں تاں ملّا بھرام ءِ جنگی کسھانی توار انگت چَر ورگ ءَ اَنت ءُ دڑامب ءِ سر لٹ ءَ چہ کمبر قاضی ءَ ھم چاربڈی بستگ ءُ نُوتک ءِ ھمراھی ءَ سر جھل ءُ دیم پہ پسنی ءَ قاضی ءِ دیوان ءَ سر گِپتگ ۔
گرمین لیوار کہ کش ایت گڑا چہ پیم گُرو ءِ بچکند گِیر نیا اَنت۔کیچ ءِ دلبند ءَ گُرو ءِ جنگی کسّہ انگت نکش اَنت۔منی ھیالانی توک ءَ گُرو اَنگت تُپنگ ءِ بیرل ءَ لَتر کشّگ ءَ اِنت ءُ گوں عطاء ھمراھی ءَ دنیم پہ دشمن ءِ سرین پُرش دیگ ءَ سرگپتگ ۔ شپانی نیم پاس ءَ سرجمین جھان کہ ھاموشی ءِ مانش ءَ وت ءَ َبار دنت ۔بلوچستان ءِ دمک دمک ءَ چہ اوگامانی توار لھم لھم ءَ گُوشان کَپ ایت۔شال ءِ برپ بستگیں بدن ءَ کمبر چاکر ءُ چہ لیاری ءِ پُر مھریں دمکاں گنجل ءِ ترانگ دل ءَ مھکمی ءِ سبک نکش کن اَنت۔ ھمے ھیالانی دیم ءَ وھدے گوں وشکوشیں پروم ءَ دیاں تا گنداں پیرک درو لوگ ءِ دیم ءَ نِشتگ ءُ مات ءِ دستاں چُکگ ءَ اِنت ءُ مات ءَ پیرک ءِ پیشانی وتی دلبند ءَ داشتگ۔ شیھو ءِ ژانگ ءِ توار ھم چہ پنجگور ءِ مچکدگ ءَ لھم لھم ءَ کیت ءُ من ءَ گوں وت ءَ دلگوش کنت تا گِنداں شھیدانی بلاھین مُچی یے شیھو ءِ دیوان ءَ نیشتگ۔ سنگت ثنا بھار ءُ پراز کریم پتر ءِ سر ءَ نیشتگ ءُ شیھو شیرکین گالاں گُوشدار آں ءُ شیھو ءَ گوں مسکرائی کنگ ءَ اَنت- ھمے پیم یاتانی ھمک دیار ءَ کہ من سپر کناں تہ گنداں بس آزات بلوچستان ءِ چوگان اِنت ۔مات نازینک جنان اَنت ءُ گوھاروک شھیدانی دُرست واب جاھانی سر ءَ پھل ریچان اَنت۔ گونڈو گوں بیرک ءَ سوت جناں ءُ دیم پہ وانگ جاھ ءَ روان اَنت۔بس ھر نیمگ ءَ وش ءُ شاتکامی ءِ الھان اِنت۔ پمیشکا منی یات ءُ ھیال ناں دمانی ھم بے من ءَ نبیت ،ءُ بے بلوچستان ءَ منی ساہ پُر نہ بیت انت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-