پھزداری ءِ ناگیگی، چین ءُ پاکستان ءِ سروزیراں گوادر بالی پٹ ءِ ورچوئل افتتاح کتگ

چین ءِ سروزیر لی چیانگ ءُ پاکستان ءِ سروزیر شھباز شریف ءَ نوکیں گوادر انٹرنیشنل ائیرپورٹ ءِ ورچوئل افتتاح کتگ-

پھزداری ءِ ناگیگی ءِ سبب ءَ نوکیں گوادر انٹرنیشنل ائیرپورٹ ءِ سرجمی مراگش گوادر ءَ بوگ ءَ ابید اسلام آباد ءَ کنگ بیتگ- مراگش ےَ پاکستانی سروزیر شھباز شریف ءُ چین ءِ سروزیر لی چیانگ ءَ بھر زرتگ-

چین ءِ سروزیر ءَ نوکیں گوادر انٹرنیشنل ائیرپورٹ ءِ ورچوئل افتتاح کتگ – اے وھد ءَ چین ءِ سروزیر گوشتگ گوادر انٹرنیشنل ائیرپورٹ ءِ سرجم بوگ ءِ گچینی بنھشتے، منسوبھانی سرجم بوگ ءَ پاکستان ءُ چین ءِ مھلوک ءِ جھد ستاکرز اَنت-

آئی ءَ گوشتگ گوادر دمگی دیمروئی ءِ ھواری ءَ ھردوکیں ڈیھانی مھکمیں دوستی ءِ پدراھی ءَ کنت اِنت- پاکستان ءِ دیمروئی ءِ واستا چین وتی کرد ءَ پیلو کنان کنت اِنت-

سروزیر شھباز شریف ءَ گشتگ کہ گوادر انٹرنیشنل ائیرپورٹ پاکستان ءِ واستا چین ءِ ٹیکی اِنت-

ھمے وھد ءَ پاکستان ءُ چین ءِ نیام ءَ جتا جتائیں پڑانی تہ ءَ یاداشتانی تہ ءَ گیشی آرگ بیتگ- ایشی ءِ تہ ءَ دوئیں ملکانی نیام ءَ سمارٹ کلاس روم، سی پیک ءِ چیر دستی ءَ گوادر ءِ ھوالگ ءَ ھپتمی یکجائی کارگس ءِ دیوان ءِ نکاتانی دسھتی ءُ سی پیک ورکنگ گروپ ءِ ھوالگ ءَ لوٹانی تہ ءَ بدل کنگ بوتگ انت-

دوئیں ملکانی نیام ءَ انسانی وسائل ءِ دیمروئی، اھوالکاری، رھوتی، آپی آسراتی ءُ ایمنی ءِ شوبگ ءَ کمک ءَ را گیش کنگ ءِ واستا پاکستان ءُ چین ءِ نیام ءَ یک دستاویزاتے مٹ ءُ بدلی ھم کنگ بوت، وھدیکہ وردن ءُ وراک ءِ پڑ ءَ پاکستان ءُ چین ءِ نیام ءَ لوٹانی درچ ھم پیش کنگ بوتگ انت-

پاکستان ءُ چین ءِ نیام ءَ زرّ ءِ بدل کنگ ءِ مسام ھم بوتگ، اسٹیٹ بینک ءُ پیپلز بینک آف چین ءِ نیام ءَ کرنسی ءِ بدلی ءِ مسام کنگ بوتگ۔

زانگ بہ بیت گوادر ءِ بالی پٹ سی پیک ءِ پروجیکٹ ءِ یک بھرے، سی پیک ءَ را بلوچ سیاسی ءُ جنگی تک ءُ پھناتانی نیمگ ءَ لُٹ ءُ پُلی پروجیکٹ گشگ بوتگ، ایشی ءِ پسو ءَ سیاسی تک ءُ پھناتاں ملک ءُ درملک ءَ جتاجتائیں دیواناں زھرشانی کتگ ءُ بلوچ ءَ سی پیک سلاھبند کتگ۔ ءُ دگہ پارسات آجوئی دوستیں گلانی نیمگ ءَ نشانگ جوڑ کنگ بوتگ اَنت۔

زانگ بہ بیت کہ گوادر بندرگاہ، سی پیک، سینڈک ءُ اے دگہ پروجیکٹانی سوب ءَ بلوچستان ءَ چینی انجینئر ءُ ایندگہ اگدہ دارانی سر ءَ وت کُشیں اُرش گیش بوتگ اَنت۔

اے گپ دلگوش داری انت کہ بلوچ لبریشن آرمی 2018 ءَ چہ چین ءِ زرکاری ءُ پوجی لوٹ مدام نشانگ جوڑ کنگ ءَ اِنت ءُ انوگیں وھد ءَ بی ایل اے فدائین یونٹ مجید بریگیڈ ءُ انٹیلی جنس ونگ زراب ءَ کراچی ءِ یک سکیں گچینی جاھے ءَ تنگیں سیکورٹی ءِ جاہ ءِ تہ ءَ چینی انجینئرانی سر ءَ اُرش کتگ ات – اے اُرش ءَ چہ اے گپ پدر بیت کہ گل پاکستان ءِ ھرجاہ ءَ چینی لوٹ ءُ منسوبھانی سر ءَ اُرش کنگ ءِ بودشت ءَ دار ایت-