سے جتاجتائیں اُرشاں دُژمنیں پوج کارمند ءُ دو چاریگ کوش زمہ واری بی ایل اے ءَ منّ اِتگ

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں یک درشانے ءِ تہ ءَ گوشتگ کہ سرمچاراں مچ، تربت ءُ مستونگ ءَ زورگریں پاکستانی پوج ءِ سے جتاجتائیں اُرشاں نشانگ کتگ ءُ وتگڑیں ڈیتھ اسکواڈ ءِ یک کارمندے کشگ ءَ ھوار بی ایل اے ءَ دست ءَ ملٹری انٹیلی جنس ءِ چاریگ ءِ مرگ سزا داتگ-

جارکش ءَ گوشتگ کہ بی ایل اے ءِ سرمچاراں گوستگیں شپ ءَ بولان ءِ دمگ مچ ءَ پنیر اسٹیشن ھند سر ءَ زورگریں پاکستانی پوج ءِ کارمند یک اُرشے ءِ نشانگ کتگ، سرمچاراں اسنائپر اُرش ءَ یک دُژمنیں کارمند ءِ کُشگ ءَ پد دُژمنیں پوسٹ سر ءَ وتکاریں سلاھاں چہ اُرش کتگ، چریشی ءِ آسر ءَ دُژمن ءَ گیش جانی ءُ مالی تاوان چست کنگ کپتگ-

جارکش ءَ گوشتگ کہ بلوچ لبریشن آرمی ءِ سرمچاراں مروچی تربت ءِ دمگ نودز ءَ زورگریں پاکستانی پوج ءُ چیریں ادارھانی جوڑ کتگیں ڈیتھ اسکواڈ ءِ ھاسیں کارمند امان اللہ ء عبدالحمید کشتگ وھدے کہ آئی ءِ یک سنگتے ٹپی بیتگ-

درشان ءِ تہ ءَ گوشتگ کہ دُژمن ءِ چاریگ امان اللہ دوھزار یازدہ ءَ چہ زورگریں پوج ءِ سروکی ءَ برجاھیں ڈیتھ اسکواڈ ءِ بھر ءُ ریاستی کاسگ چٹیں سروکیں چاریگ راشد پٹھان ءِ یک ھاسیں کارمندے یے بیتگ- امان اللہ نودز ءَ ھوار شے کھن ءُ گیبن ءَ پاکستانی پوج ءِ ھمراھی ءَ سر بیڑ، ورنایانی زورانسری بیگواہ کنگ ءُ تیرگواری نشانگ کنگ ءَ ھوار بیتگ وھدے کہ اشی ءِ بدل ءَ زورگریں پوج ءَ اش دُزی، ڈنگی ءُ منشیات باپاری ءِ موکل داتگ-

جارکش ءَ گوشتگ دُژمن ءِ چاریگ امان اللہ کیچ ءِ دمگ نودز ءَ وتی کارمنداں وتی ھمراہ شھید جلال پنّام بلوچ ءِ لوگ سر ءَ اُرش کتگ دودمان لگتمال کتگ، اشی ءَ اَبید ناصرآباد ، شورما ءِ کوھاں پوجی لشکر کشی ءَ ھم تچکی ءَ ھوار بیتگ- وھدے کہ امان اللہ ءِ کستریں برات شاھد وتی ھمراہ نثار میران ءِ ھمراھی ءَ دوھزار نوزدہ ءَ بلوچ لبریشن آرمی ءِ سرمچاراں راہ بندگ جھد کنگ ءَ کشگ بیتگ –

جارکش ءَ گوشتگ کہ بلوچ لبریشن آرمی ءِ سرمچاراں دگہ یک کاروائی مستونگ ءِ دمگ اسپلنجی مَرو ءَ ملنگ دروشم ءَ نندوکیں زورگریں پاکستانی پوج ءِ یک چاریگ مجیب الرحمان ء عبدالرحمان چار روچ ءَ ساری گپتگ-

آئی ءَ گوشتگ کہ پٹ پول میان ءَ مجیب الرحمان ءَ منّ اِتگ آ پاکستانی پوج ءِ ملٹری انٹیلی جنس ( ایم آئی) واستا دہ سالاں چہ شال ، اسپلنجی ءُ مَرو ءَ چاریگری کار کنگ ءَ بیتگ- چاریگ ءَ منّ اِتگ کہ شال ءَ روگ ءَ پد میر زیب قمبرانی ءَ چہ پاکستانی پوج ءِ چیردستی ءَ چاریگری بندات کتگ ءُ پد ءَ عاصم کرد گیلو ءِ سروکی ءَ کار کنگ ءَ بیتگ-

آئی ءَ گوشتگ کہ مجیب الرحمان ءَ منّ اِتگ کہ عاصم کرد گیلو گوشگ رد ءَ آ چہ شال ءَ سلمان قمبرانی ءُ گزین قمبرانی ءِ چاریگری کنگ ءَ پد پاکستانی چیریں ادارہ ءُ پوج ءِ دست ءَ زورانسری آوار جنی ءَ تچکی ءَ گون بیتگ-

جیئند بلوچ ءَ گْوشتگ کہ زانگ بہ بیت ھشت جولائی دوھزار پانزدہ ءَ پاکستانی پوج ءَ چہ کلی قمبرانی ءَ نودربر گزین قمبرانی ءُ سلمان قمبرانی زورانسری بیگواہ کنائینتگ اَنت ءُ چاردہ اگست دوھزار شانزدہ ءَ شال ءِ دمگ ھزار گنجی ءَ یک ڈرامائی ءِ دروشم ءَ میڑ نام داتگ گزین قمبرانی ءُ سلمان قمبرانی ءُ دگہ یک ورنایے ھمراھی ءَ شھید کتگ اِت اَنت کہ آئی ءِ پجّار نہ بیتگ اَت-

جارکش ءَ گوشتگ کہ چاریگ مجیب الرحمان ءَ گوشتگ کہ ورنایانی شھیدی ءَ پد اسپلنجی ءَ چاریگری واستا برتگ- اود ءَ یک سالے نُھ ماہ ءَ تاں نشتگ وھدے اشی ءَ پد اسپلنجی ءِ دمگ مَرو ءَ دروشم مٹ کتگ چاریگری کار ءَ کنگ بیتگ – اشی ءَ منّ اِتگ ھمے میان ءَ لوگانی سر ءَ بیڑ جنگ ءُ مردمانی بیگواہ کنگ ءَ ھوار بیتگ-

آئی ءَ گْوشتگ کہ اے دُژمنیں چاریگ سر ءَ راجی میارباری پدر بیگ ءَ بلوچ راجی آمیدگس ءَ مرگ پرمان داتگ، چریشی ءَ سرمچاراں گامگیج زرتگ ءُ گُڈی آسر ءَ سر کتگ-

جارکش ءَ گُڈی ءَ گوشتگ کہ بلوچ لبریشن آرمی ءَ سے اُرشانی زمہ واری منّ اِتگ- زورگریں پاکستانی پوج ءُ آئی ءِ چاریگانی ھلاپ ءَ مئے اُرش برجاہ بنت-