دگہ چار بلوچ ورنا زورانسری آوار جنی ءِ نشانگ کنگ بیتگ اَنت

پاکستانی پوج ءِ دست ءَ چہ جتاجتائیں دمگاں چار بلوچ ورنا زورانسری آوار جنی ءِ نشانگ کنگ بیتگ اَنت-

گیشیں ھالانی رِد ءَ پاکستانی پوج ءَ بلوچستان ءُ پاکستانی استان چہ پنجاب ءَ چار بلوچ ورنا آوار جنگ ءَ پد ناشناسیں جاھے ءَ برتگ اَنت چریشی ءَ پد آ بیگواہ ءَ اَنت-

شپ وھد ءَ پنجاب پولیس ءَ سادیں پوشاکانی تہ ءِ پاکستانی چیریں ادارھانی کارمنداں پنجاب ءِ بُنجاھی شھر لاھور ءَ وانوکیں بلوچ نودربرانی ھاسٹل ءُ کمرھانی سر ءَ بیڑبرتگ بلوچ نودربر لَٹ کُٹانی نشانگ کتگ اَنت ءُ چار بلوچ نودربر وتی ھمراھی ءَ برتگ اَنت-

چہ لاھور ءَ آوار جنگ بیتگیں چار بلوچ نودربر دو پد ءَ یل کنگ بیتگ اَنت وھدے کہ شمریز ء ماسٹر فرید ءُ دیدگ بلوچ زھری ء یونس زھری انگت دیم ءَ آرگ نہ بیتگ-

پنجاب ءَ وانوکیں بلوچ نودربر ءِ کونسل سنگتانی زورانسری آوار جنی راست کتگ-

ھمے وڑ بلوچستان ءِ دمگ چہ تربت ءَ ھالانی رِد ءَ مروچی سھب ءَ پاکستانی سیکورٹی فورسز ءُ سی ٹی ڈی ءَ آسکانی بازار ءَ یک لوگے سر ءَ بیڑبرتگ وفا منظور بلوچ ءُ محیم جان بلوچ آوار جتگ ءُ بیگواہ کتگ اَنت-

بلوچ یکجھتی کمیٹی ءَ دوئیں ورنایانی زورانسری آوار جنی راست کتگ گوشتگ کہ یک گریبیں لوگے ءَ چہ سیادی داروکیں وفا درزی کار ءَ بیتگ، وھدے کہ محیم تربت یونیورسٹی ءَ بائیو کیمسٹری نودربرے، اے وھد ءَ آ وتی مڈٹرم پیپر ءَ دیگ ءَ بیتگ-

بی این ایم ءِ انسانی ھکانی ادارہ پانک گوشگ اِنت کہ دو روچ ءَ ساری ھشت اکتوبر ءَ پاکستانی پوج ءَ آواران ءِ دمگ چہ جھاؤ ءَ علی محمد نامیں مردمے آئی ءِ دکان ءَ چہ بیگواہ کتگ-

بلوچستان ءَ گوستگیں بیست چار کلاکانی تہ ءَ زورانسری آوار جنی ءِ ھپتمی وئیل اِنت نکش بیتگ اشی ءَ ساری لاھور ءُ ھب چوکی ءَ ھم سے بلوچ ورنا زورانسری آوار جنی ءِ وئیل نکش کنگ بیتگ-