ڈیرہ بگٹی ءَ لشکر کشی برجاہ ءَ اِنت : ھیلی کاپٹرانی شیلنگ

بلوچستان ءِ دمگ ڈیرہ بگٹی ءَ لشکر کشی چارمی روچ ءَ ھم برجاہ ءَ اِنت – اے میان ءَ پاکستانی پوج ءِ شش جنگی ھیلی کاپٹر یکشل ءَ لنجو ءُ سغاری ءَ لَس آبادیاں نشانگ کنگ ءَ اَنت، چریشی ءَ یک زھگے ءَ ھوار دو مردم ءِ ٹپی بیگ ھال سر بیتگ-

سندھ ءِ نزیکیں دمگ کشمور ءَ دگہ گیش بیست گاڑیاں ھمگرنچ پوجی کاروان ڈیرہ بگٹی ءِ سیمسر ءَ لنجو سغاری ءِ دمگ ءَ پُترتگ-

زانگ بہ بیت کہ ڈیرہ بگٹی ءَ گوستگیں چار روچاں چہ یکشل ءَ لشکر کشی برجاہ ءَ اِنت چریشی ءَ لنجو، سغاری، رئیس توخ ءُ کچی کینال سرجمیں دمگ ھوار اَنت – مزنیں کچے ءَ جھلی پوج ءِ واستا بُرزی کمک شش ھیلی کاپٹر یکشل ءَ دمگاں شیلنگ کنگ ءَ اَنت ءُ پوجی چوکی لَس آبادیانی سر ءَ مارٹر گولہ آس دیگ ءَ اَنت-

ھیلی کاپٹرانی شیلنگ ءُ مارٹر اُرشاں تاں انو یک درزنے ءَ گیش مردم ٹپی بیتگ اَنت کہ آیانی تہ ءَ گیشتر زالبول ءُ زھگ ھوار اَنت-