ایرانشھر، زاھدان،کسرکند: ناشناسیں مردماں سَے مردم کشتگ اَنت

روکپتی بلوچستان ءِ جتا جتائیں جاھاں ناشناسیں مردماں یک زھگے ءَ ھوار سَے مردم کشتگ اَنت-

گیشیں ھالانی رد ءَ روکپتی بلوچستان ءِ دمگ ایرانشھر ءَ بازار ءَ بمپور اسٹیشن ءِ نزیک ءَ گاڑی سواریں سلاہ بندیں مردماں یک ورنایے سر ءَ تیرگواری کتگ ءُ چریشی ءَ یک مردمے بیران بیتگ-

بیران بیتگیں مردم ءِ پجار شھاب میر بلوچزئی ء شیر مھمد جھمنند ایرانشھر ءِ نام ءَ زنگ بیتگ-

اھوالانی رد ءَ شھاب بازار ءَ موٹرسائیکل مارکٹ ءِ نزیک ءَ بیتگ کہ اود ءَ اچانگی گاڑی سواریں مردماں آئی ءِ سر ءَ تیرگواری کتگ ءُ چریشی ءَ آ ھما جاہ ءُ بیران بیتگ –

وئیل ءِ سبب زانگ نہ بیتگ کوشکار ھم پجار نہ بیتگ اَنت-

ھمے ڈول ءَ زاھدان ءَ ناشناساں یک کسان سالیں زھگے کارچ جتگ ءُ کشتگ –

آئی ءِ پجار سیزدہ سالی ئیں بلال براھوئی ء ربانی ءِ نام ءَ زانگ بیتگ ءُ آ زاھدان ءِ جھمنند اِنت-

ھمے ڈول ءَ کسر کند ءَ ناشناسیں مردماں تیرگواری کتگ ءُ یک ورنایے کشتگ-

کشگ بیتگیں مردم ءِ پجار بیست ءُ پنچ سالی ئیں ھمایون تخشیدہ ء شاہ بخش ءِ نام ءَ زانگ بیتگ کہ آ دنسر تلنگ ءُ دک کسرکند ءِ جھمنند اِنت-

روکپتی بلوچستان ءَ ھمک روچ سلاہ بندیں مردمانی تیرگواری ءَ بازیں مردم بیران ءُ زدگ بوگ ءَ اَنت کہ اود ءَ چوشیں روچے پِر نہ گوز ایت کہ اے دابیں وئیل پیش آیگ ءَ نہ اَنت-