بلوچستان : تیرگواری ءُ دگ وئیلاں یازدہ مردم بیران نوزدہ ٹپی بیتگ اَنت

الم بوانیت

بلوچستان ءِ جتاجتائیں دمگاں بیتگیں دگ ءُ تیرگواری وئیلانی آسر ءَ زالبولے ءَ ھوار یازدہ مردم بیران نوزدہ مردم ٹپی بیتگ اَنت-

گیشیں ھالانی رِد ءَ بلوچستان ءِ دمگ پنجگور ءِ ھند ڈمب ءَ بلوچی زبان ءِ نامی ئیں گُشندہ رسول بخش پنجگوری ءِ چک عمیر رسول بخش ناشناسیں سلاہ بندیں گاڑی سواریں مردمانی تیرگواری ءَ چہ بیران بیتگ-

ھمے وڑ کیچ ءِ تھسیل تربت ءَ سی پیک دگ سر ءَ وئیل ءَ وین پرپٹ سوار ڈِکر جتگ ءُ کُشتگ اَنت، وئیل آسر ءَ نعیم ء پلین جھمنند گونکی شھرک، ریاض ء شیران جھمنند گونکی شھرک بیران بیتگ اَنت-

دوئیں مردم ٹیچنگ نادُراھجاہ تربت ءَ برگ بیگ ءَ پد لاش کھول ءِ دست ءَ داتگ اَنت-

ھمے شال ءِ دمگ بروری بائی پاس سر ءَ آروسیانی بس کنڈ ءَ کپتگ ءُ چریشی ءِ آسر ءَ زالبول ءُ زھگاں ھوار ھشت مردم بیران ءُ نوزدہ ٹپی بیتگ اَنت-

آروسیانی بس خلجی کالونی ءَ چہ بلیلی ءِ نیمگ ءَ روگ ءَ بیتگ ھمے میان ءَ گاڑی ءِ ٹائر ترکّ اِتگ ءُ گاڑی کنڈ ءَ کپتگ-

پولیس رِد ءَ وئیل آسر ءَ زالبول ءُ زھگاں ھوار کم چہ کم ھشت مردم بیران ءُ نوزدہ ٹپی بیتگ اَنت-

شھریاں وتی کمک ءَ چہ بیران بیتگیں مردمانی لاش ءُ ٹپی بس ءَ چہ درکتگ ءُ بی ایم سی ءَ برتگ اَنت کہ اود ءَ الاج کنگ ءَ پد نادُراھجاہ ءَ برگ بیتگ اَنت-

نوکتریں