شال: وتی پسند ءَ آروس کنوکیں جنک بلوچستان ءِ سرکار ءَ وتکش پدر کتگ

بلوچستان ءِ سرکار ءَ چہ تربت ءَ سیادی داروکیں عدیلہ نامیں جنکے ءَ پریس کانفرنس کنائینتگ ءُ آئی ءَ را گمانی رنگ ءَ وتکش اُرشکار پدر کتگ-

بلوچستان ءِ سرکار ءِ جارکش شاھد رند ءُ بنجاھی پتر ءِ باسک فرح عظیم شاہ ءَ کیچ ءَ سیادی داروکیں عدیلہ نامیں جنکے ءِ ھمراھی ءَ پریس کانفرنس کنان ءَ آ وتکش اُرشکارے پدر کتگ-

دومی نیمگ ءَ بلوچ اھوالکار کیا بلوچ ءَ بلوچ لبریشن آرمی ءِ آپریشن ھیروپ ءِ نیمگ ءَ لنکک دیان ءَ ایکس ءَ پوسٹ کتگ کہ اسلیں وتکش بمباراں یکیں روچ ءَ یازدہ دمگاں اُرش کتگ -روچی ھما زالبول کہ وتکش بمبارے جوڑ کنگ ءُ پیش کنگ بیتگ کہ ایشی ءَ راستی ءَ رودبن کیچ ءَ وتی پت ءِ نہ منگ ءَ آروس کتگ – ءُ جنک ءَ پت ءُ مات ءَ را رھوت کتگ ءُ گوشتگ کہ آ لوگ ءَ نیایگ اِنت ءُ پد ءَ ھرچی بیتگ درست شُمئے دیم ءَ اَنت-

زانگ بہ بیت گوستگیں روچاں پولیس ءِ نیمگ ءَ تھریٹ الرٹ شنگ کنگ بیتگ ءُ ٹاہ دیگ بیتگ کہ شال ءَ یک زالبولیں وتکش اُرشکارے اتکگ کہ چریشی ءَ مروچی پریس کانفرنس کنوکیں جنک عدیلہ بلوچ نامیں جنکے ءِ نام دیگ بیتگ-

مروچی پریس کانفرنس ءِ درگت ءَ شال ءَ جھمنندیں اھوالکارانی گوشگ اِنت اے پریس کانفرنس ءَ بس لھتے اھوالکار لوٹاڑینگ بیتگ اَنت-

زانگ بہ بیت بلوچستان ءَ اے دابی ءَ گوست ءَ ھم زالبول دزگیر کنگ ءُ وتکشی دروشم ءَ پیش کنگ بیتگ اَنت-

ایشی ءَ پیش کیچ ھوشاپ ءَ ھم یک زالبولے دزگیر کنگ بیتگ ءُ ھمے ڈول شال ءَ ماھل نامیں زالبولے دزگیر کنگ بیتگ ءُ پد ءَ مھلوک ءِ کوکاراں پد یل دیگ بیتگ-