روکپتی بلوچستان: سرکاری وانگجاھاں گیشیں زَر ءِ لوٹ

سیستان و بلوچستان ءِ وانگجاھان سرکاری وانگجاھاں اَچ نودربراں زَر ءِ لوٹ کتگ ءُ گوشتگ زَر بہ دے اِت-

روکپتی بلوچستان ءِ بنجاھی شھر زاھدان ءَ سرکاری وانگ جاہ ءَ کتابانی زیرگ ءُ دگہ زَرانی دیگ ءِ لوٹ کتگ-

اھوالانی رد ءَ شنگ بیتگیں یک تامربندے ءَ گندگ بیت اِنت کہ اود ءَ سال ءِ بندات ءَ سرکاری وانگ جاہ ءَ یک سد ءُ پنجاہ ھزار ءَ بہ ھر داں پنچ سد ھزار تومان ءِ لوٹ ءَ کنگ ءَ اَنت-

بازیں جاھانی نودربران اے گلگ ءِ زھر درشان کتگ چُشکہ دانش در مھر شھر، مدرسہ ھدیجہ کبری شھرک گاوداران ءُ مدرسہ شھید نورمھمد مھمد گورگیج زاھدان ءِ وانگاجاھاں سد ءُ پنجاہ ھزار ءَ بگر داں پنچ سد ھزار تومان ءِ لوٹ کتگ-

سرکاری رسانکدر ءِ رد ءَ سیستان ءُ بلوچستان ءَ یک لک ءُ شست ءُ ھزار ھشت زھگ اَچ وانگاجاھاں ڈن اِنت کہ اے زھگاں وانگ یل داتگ- کہ ایشانی گیشتریں سبب زَری جاور ھال پیش کنگ بیتگ اَنت –