بلوچ یکجھتی کمیٹی ءِ جارکش ءَ گْوشتگ کہ پاکستان ءِ ریاست ءَ چارمی شیڈول ءِ تہ ءَ ھوار کنان ءَ بلوچستان ءَ سدانی کساس ءَ مردمانی زند بے ایمن کتگ۔ چارمی شیڈول ءِ تہ ءَ ھواریں مردمانی تہ ءَ پروفیسر، استاد، ادیب، ڈاکٹر، اھوالکار، سیاسی، چاگردی ءُ انسانی ھکانی جھدکار ھوار اَنت کہ آیانی تہ ءَ سرجمیں بلوچستان ءِ سداں مردم ھوار اَنت۔ وھدے کہ چارمی شیڈول ءَ ھواریں مردمانی نام ریاستی اطلاعات ءِ کارندہ سی ٹی ڈی ءِ نام ءَ فون کنگ ءَ اطلاعات ءِ کارگساں ھوار بوگ ءِ ھاتر مجبور کنگ ءَ اَنت۔ وھدیکہ پاکستان ءِ ریاست ءَ سداں بلوچ پروفیسر، استاد، ادیب، ڈاکٹر، اھوالکار، سیاسی، چاگردی ءُ انسانی ھکانی جھدکار گوں سلاہ بندیں گلاں ھمگرنچ کتگ ءُ آیانی نام چارمی شیڈول ءِ تہ ءَ ھوار کتگ ءُ آیانی کھول ءِ مردماں ذھنی ٹارچر ءِ آماچ کتگ. جوڑ کنگ بوگ ءَ اِنت۔
جارکش ءَ گْوشتگ: ما سرپد بئیں کہ بلوچستان ءِ ریاست چارمی شیڈول ءِ وڑیں پندلاں کارمرز کنگ ءَ اِنت کہ مردماں گوں زوراکی ءَ بیگواہ کنگ، بے عدالتیں کُشگ ءُ فوجی زوراکی ءِ ھمراھی ءَ ترس ءُ بیم ءِ تہ ءَ ءُ مدامیں ذھنی درد ءِ تہ ءَ بہ دار اِیت۔ چارمی شیڈول ءُ اے وڑیں دگہ زوراکیں ریاستی پندلانی مول ءُ مراد سرجمیں بلوچستان ءَ را یک انچیں زندانے جوڑ کنگ اِنت کہ اودءَ مردم بے ریاست ءِ واھگ ءَ ساہ ھم کشّ اِت نہ کنت۔ ریاست پاکستان وتی دراھیں زوراکی ءُ غیر انسانی شوربندیاں کانون ءُ نام نہاد صوبائی اسمبلی ءِ وسیلہ ءَ بلوچستان ءَ اے نوکیں شوربندی ءِ دیم ءَ برگ ءِ ھاتر ءَ کانونی جوڑ کنگ ءَ اِنت کہ ایشی ءِ نوکیں مسال سداں مردمانی چارمی شیڈول ءِ تہ ءَ ھوار کنگ اِنت۔
آئی ءَ گْوشت کہ ما ریاست ءُ آئی ءِ درائیں ادارگانی دیم ءَ اے گپ ءَ پدّر کن اِیں کہ ما بلوچستان ءَ ریاست ءِ سر ءَ ھمک زلم ءُ زوراکی ءِ دیم ءَ اوشتگیں ءُ مردمی زور ءِ وسیلگ ءَ بلوچستان ءَ ریاست ءِ اے وڑیں دراھیں انسان دوستیں شوربندی ءُ پالیسی ھلاس کن ایں ۔ وھدیکہ ما چہ انسانی ھکانی ادارگاں دزبندی کن ایں کہ ریاست ءِ نوکیں زوراکی ءِ پالیسی ءُ بلوچستان ءِ تہ ءَ انسانی ھکانی لگتمالیانی سر ءَ زوت نوٹس بہ زور اَنت۔