بلوچ سلاہ بندیں جنبشانی تہ ءَ ایراد ءُ دلوشی
نبشتہ کار: شَکّل بلوچ
دی بلوچستان پوسٹ
ایراد ءُ دلوشی دو جتائیں چیز اَنت، اے یک ءُ دومی ءَ گوں ھچ سیادی نہ دار اَنت، بلے ھر دوئیں پہ پندل سازینگ ءَ ھر وھد ءَ یک تنظیمے ءِ ٹُکّگ ءَ کارمرز بنت اے باز براں دژمن ءِ رِپک ءُ ھُنرے بوت کن اَنت، کہ آ ایشاں جنبشانی تہ ءَ شنگ ءُ تالان کن اَنت۔
اول وَ ایش اِنت کہ آ پیسر ءَ جُنز ءِ ھلاس کنگ ءَ دو گل جوڑ کنت کہ چہ آیاں یکے ءِ کار ایش اِنت کہ سلاہ بندیں جنبشانی ھر کارے ءِ سر ءَ ایراد بہ بکنت داں کہ آ گل ءَ رد ءُ ناشرکار بہ منّارین اِیت ءُ دومی رِپک اِیش اِنت کہ راج ءَ را بازیں بھراں بھر کنگ بیت، راج ءَ چہ یکے دومی ءَ جتا کنگ ءَ جتا جتائیں رھبند کارمرز کن اَنت۔ انچوش کہ پہ درور: آ زات، مذھب ءُ امیر ءُ نیزگار ءِ نیام ءَ بگیری پیداک کنان ءَ یکے دومی ءَ جتا کنگ ءِ جھد ءَ کن اَنت۔
شرگداری: چوناھا راستی ایش اِنت کہ نگد کنگ بدیں کارے نہ اِنت بلکیں بدیں کارانی بزاں ارادہ، سیلکاری دگہ باز انچیں بدیں پگر ءُ ھیال بنت آیانی اسلاہ کاری یا پہ گِھتری ءِ واست ءَ کنگ بیت۔ بلے نگد چہ سسا ءُ سمائی بہ بیت، نگد ءِ دو دروشم اَنت، یکے پگری بزاں سمائی یا راست گندی نگد اِنت ءُ دومی چَپ گندی نگد اِنت ھرکس کہ ایراد کنت گڑا آئی ءِ کر ءَ ھما زانت ھم بہ بیت۔
داں کہ آ سابت کُت بہ کنت ءُ آئی ءِ تہ ءَ چیزے راستی بہ بیت ءُ نگدکار کہ جیڑہ ءِ سر ءَ کہ گپ کنگ اِنت گڑا نگدکار ءِ کر ءَ جیڑہ ءِ بابت ءَ مواد اوں بہ بنت، نگدکار ءِ کار اے نہ اِنت کہ گل ءَ ھلاس بہ کنت بلکیں نگدکار ءِ کار گل ءِ تہ ءَ ھر ھما جیڑہ یا سیلّیں اَمل کہ بوگ ءَ اِنت آئی ءِ نَزّارگ ءُ گِھتر کنگ اِنت، داں کہ گل گیشاں چہ گیش مُھکم ءُ مزبوت بہ بیت ءُ ایشی ءَ چہ پد نگدکار ءِ کار مدام ھمیش بیت کہ گل ءِ ھما اَمل، پگر یا کار مدام پہ گِھتری ءِ نیمگ ءَ بروت ءُ مدام نگدکار ھمے اُمیت ءَ دار اِیت۔
کہ گل ءِ ھر وھد ءِ کاراں چار ءُ تپاس کنگ اِنت ردیانی دیم ءَ دارگ ءُ راست کنگ، گل ءَ نزور کنگ ءَ نَیل اِیت ءُ ھرچ وڑیں جنبشے ءِ تہ ءَ سمائی نگد سک باز المی اِنت سمائی نگد ھرچ ردی یے دیم ءَ کار اِیت۔ جنبش ءَ گیشتر یکجاہ ءُ مُھکم بہ کنت، بلے انچیں رنگے ءَ ایراد بہ کنت کہ دژمن چہ ایشی ءَ پائدگ چست کُت نہ کنت ایشی ءَ چہ جنبش ءُ راج ءِ سر ءَ ردیں سانے مہ دنت، بلکیں انچیں وڑے ءَ بہ کنت کہ راج گیشتر گل ءِ نیمگ ءَ دلگوش بہ بیت۔
رسانکدر ءِ سر ءَ نگد کنگ ءَ چہ بہ رکّ اِت پرچا کہ دژمن ءِ وتگڑیں مردم چہ رسانکدر ءَ نشتگ اَنت ءُ آ بلکیں گندگ ءَ تئی سنگت اَنت بوت کنت، بلے آ زانت ءُ زانگ ءَ تئی نگد ءَ چپ گندی تَب ءَ دے اَنت ءُ گیشتر دیم ءَ برگ ءَ اَنت نگد بکن بلے یک راستگندی دروشم ءَ، اے جُھد ءَ مہ بَہ اِت کہ گل یا تنزیم ءَ ھراب بہ کن اِت، بلے تنزیم ءِ ردیانی شوھازگ ءِ ھاتر ءَ اے کار ءَ بہ کن اِت۔
دلوشی : جنگانی تہ ءَ دلوشی ءَ ھچ جاگہ نیست پرچا کہ جنگ یک لیبے نہ اِنت، یا کہ مسکرا یے کہ یک دمان ءَ تو بہ کَٹّ ئے ایشی ءَ گوں جنگ ءَ ھچ سیادی نیست ھما مردم کہ جنگ ءَ لیبے پَھم اِیت بزاں آ دگنیا ءِ نالائکتریں انسان ھما اِنت، جنگ پہ جنگولے ءِ واست ءَ یک جتائیں دگنیا یے چی ءَ کہ آ وھدے کہ جنگ ءَ روت آئی ءَ را دگہ ھچ گون نیست بس آئی ءَ دلگوش ، اَمل ءُ پگر ءِ پلسپہ گون اِنت۔
آشوبی جنگ ءَ تئی جند ءِ کُربانی گون اِنت، پرچا کہ آشوبی کُربانی لوٹ اِیت۔ دلوشی یک سکیں نزوریں ءُ زھرناکیں اَملے کہ ایشی ءِ تہ ءَ دژمن ترا گوں جنگ ءَ وتی برات ءِ دژمن جوڑ کنت ءُ ھرکس ءَ کہ اے کار وتیگ کتگ آ داں ھدے ءَ سوبمند بوتگ اے چہ زات ءَ بندات بیت ءُ کم کم ءَ لوگ ءَ سر بیت ءُ جوڑ کنت۔
دلوشی راستیں ءُ تچکیں جُھدکارے ءِ تہ ھجبر بوت نہ کنت، جھدکار سرجم ءَ وتی اندری واھشت چہ بُن ولگوج کتگ، جنگ پگر ءَ گوں بندوک اِنت اگاں تئی پگر گوں دلوشی ءَ بندوک بوت گڑا تَھنا گل تاوانبار بیت بلکیں آئی جند ءُ گوں درستیں رھبنداں تباہ کنائین اِیت۔
پرچا کہ جنگ ءِ تہ ءَ گلتی ءِ ھچ گنجائش نیست، ءُ ردی چہ کجا کاینت، ھمے پگر اِنت کہ تئی دزمھار ءَ بہ بیت اگاں تئی پگر ءُ ھوش کہ دری رسانکدر یا دل وشیں جنکے ءِ نیمگ ءَ گْور بوت بزاں ترا وتی ھوش ءِ دزمھار پَھک در کُتگ۔
آسر:ایراد ءُ دلوشی ھر دو باز جتائیں رنگ اَنت، اگاں دلوشی ءِ نیمگ ءَ دلگوش گْور بوت گڑا اود ءَ چَپگندی ءِ ایراد ود اِیت، اگاں راستگندی ءِ نیمگ ءَ وتی اگل دلگوش کُت گڑا اود ءَ سمائی نگد ود اِیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-