سرمچارانی ارزشت پہ بلوچ راج ءَ
نبشتہ کار: شکّل بلوچ
دی بلوچستان پوست
سرمچار چہ بلوچ راج ءِ تہ ءَ در آتکگیں ھما باسما ءُ بامرد ءُ آشوبی جُھدکار اَنت کہ آ وتی ھستیں دنیا ءِ تہ ءَ پوہ ءُ سرپد اَنت کہ زورگیریں سامراج ءِ رھبندانی ھلاپ ءَ چو کوہ ءَ مِک ءُ چِست بوتگ اَنت۔
سرمچار ءِ بزانت ءَ ما وَ ارزانی ءَ درشان ئِے کنیں کہ اے کوہ گرد، بھادر ءُ دلیر ءَ وتی سر ءِ پرواہ ءَ نہ دار اَنت بلے بلوچ راج اے سرمچارانی بابت ءَ چے جیڑ اَنت؟ بلوچ سرمچارانی زندگی پہ بلوچاں چنکیاس ارزشتے دار اَنت اے بابت ءَ بلوچ راج ءَ جیڑگ لوٹ اِیت۔
اگاں ما بلوچ راج ءِ زندگی ءَ گْوستانک بچاریں کہ گْوست ءَ زورگیراں بلوچ راج ءِ سرڈگار ءِ سر ءَ چنکیاس وھداں وتی زُلم برجاہ داشتگ کہ آیاں بلوچانی سر ءَ گوں زوراں وتی سامراجی رھبنداں بلوچ ءِ سرڈگار ءِ سر ءَ ھُکمرانی کُتگ ءُ آئی ءِ زندگی ءِ سر ءَ سوڑگ کُتگ ءُ بلوچ ءِ مال ءُ مڈّیانی لُٹ ءُ پُل کُتگ۔
چِد ءُ پیش انگریزاں ءَ بلوچستان ءِ تہ ءَ بلوچانی سر ءَ 107 سال وتی زُلم برجاہ داشتگ۔ بلے بلوچ ءِ نرمزاریں پُسّگاں بِھ کدی ھم دری زوراور ءِ دیم ءَ وتی سر جَھل نہ کُتگ ءُ چہ آیاں چہ وتی سرڈگار ءَ در اِش کُتگ اَنت۔
بلوچ راج ءِ کر ءَ بلوچ سرمچارانی سک باز ارزشت ھست اِنت۔ چہ ایشی ءَ پد 1839 ءَ مھراب ھان ءَ ءُ یوسپ ازیز بلوچ ءَ پہ بلوچ سرڈگار ءِ رکینگ ءَ یزیدیں زوراور ءِ دیم ءَ گِھگیری کُت بلے ھجبر بلوچ ءِ سودا دری زوراور ءِ کر ءَ نہ جت۔
27 مارچ 1948 ءَ پاکستان ءَ برتانیہ ءِ گْوشگ ءِ رِد ءَ پد ءَ ھان آپ کلات ءِ سر ءَ کبزہ کُت روچ ءِ مروچی بلوچستان برتانیہ ءِ بے بُنیں جوڑ کُتگیں نام پاکستان ءِ ایردستی ءَ بلوچستان ءِ مال ءُ مڈیاں یکشل ءَ لُٹ ءُ پل کنگ ءَ اِنت، روچ پہ روچ بلوچ لس مھلوک ءِ چُکچینی برجاہ داشتگ۔
بلوچ راج ءِ بلوچ سرمچاراں مدام پہ وتی سر ڈگار ءُ بلوچ راج ءِ رکینگ ءِ ھاتر ءَ گوں دژمن ءَ مکابلہ کنگ ءَ اَنت بلے ھجبر وتی سر دژمن ءِ دیم ءَ جَھل نہ کُتگ۔
انوں زوتاں پاکستان گوں چین ءِ ھمراھی ءَ سی پیک ءِ پروجکٹ ءِ رکینگ ءِ ھاتر ءَ کدی سیکیورٹی ءِ نام ءَ بلوچ سرمچاراں ناشرکار لیکگ ءَ وتی لشکر ءِ آرگ ءَ پاکستان گُشگ ءَ اِنت کہ بلوچستان ءَ وتی پوج ءَ بیار اِیت بلے بلوچ سرمچار دژمن دیم ءَ چو کوہ ءَ مِک اَنت وتی سرڈگار ءِ رکینگ ءَ یکمُشت اوشتاتگ اَنت۔
اگاں مرچی سرمچار مہ بوتیں گڑا بلوچ راج ءِ راجدپتر، زمین، زبان، ربیدگ چٹّ ءَ گار ءُ بیگواہ بوتگ اِت اَنت۔ بلوچ مھلوک ءَ وتی سما گْور کنگی اِنت گوں وتی بلوچ براتیں سرمچارانی ھمکوپگی ءَ بدار اَنت۔
بلوچ راج ءَ وتی آوکیں پدریچ ءِ ءُ گُلزمین ءِ رکینگ ءِ ھاتر ءَ وتی توار ءَ بُرز بکن اَنت، واب ءَ چہ پاد بیا اَنت اگاں ناں بلوچ وتی آوکیں زند ءَ گاری ءَ گند اِیت۔
بلوچ راج ءُ بلوچستان ءُ بلوچ سرمچار زندگ بات اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت-