بلوچستان ءِ جتاجتائیں دمگاں بارکھان ، ھاران ءُ کیچ ءَ پاکستانی پوج ءَ اِھوالکارے ءَ ھوار شش مردم زورانسری آوار جنگ ءَ پد بیگواہ کتگ اَنت-
گیشیں ھالانی رِد ءَ بلوچستان ءِ دمگ بارکھان ءَ گوستگیں روچ بیست ھپت اگست ءَ روچ دوازدہ ءَ بارکھان ورنا اتھاد ءِ سینئریں باسک آصف جان بلوچ کوھلو کمانڈنٹ ءَ لوٹائینتگ ءُ پد ءَ بیگواہ کتگ-
ھمے وڑ چہ بارکھان ءَ مروچی نامی ئیں اِھوالکار ھیات کھیتران پاکستانی پوج ءَ بُنجل ءَ لوٹائینتگ ءُ پد ءَ بیگواہ کتگ-
انچش کیچ ءِ دمگ چہ ناصر آباد ءَ پوج ءَ دو روچ ءَ ساری ندیم بیوس آوار جنگ ءَ پد بیگواہ کتگ-
ھمے وڑ گوستگیں روچ ءَ سھب ءَ کیچ ءِ بُنجاھی شھر تربت ءِ ھند سیٹلائیٹ پاکستانی پوج ءَ گوگدان ءِ جھمنند جاوید بلوچ ء عبدالواحد زورانسری بیگواہ کتگ-
دومی نیمگ ءَ ھاران ءَ مروچی مگرب ءِ نماز ءَ چہ کمو ساری پاکستانی پوج ءَ چہ چیف چوک ءَ دوئیں ورنا بختیار ء محمد غوث یلانزئی ءُ کامران ء محمد غوث یلانزئی ءِ زورانسری بیگواہ کتگ اَنت-
اِھوالکارانی رِد ءَ اے دوئیں برات اَنت کہ اشانی کھول ریڈزون ھاران کہ اود ءَ چیریں ادارھانی کارگس ھست اَنت کہ زھرشانی ئیں داتگ ءُ آیانی لوٹ اَنت اے دوئیں ورنایاں یل بہ کن اِت-