بلوچستان ءُ کراچی ءَ پاکستانی پوج ءُ چیریں ادارھاں سے مردم آوار جتگ ءُ ناشناسیں جاھے ءَ برتگ اَنت

بلوچستان ءُ کراچی ءَ پاکستانی پوج ءُ چیریں ادارھاں کارمنداں سے بلوچ پُسگ ءِ آوار جنگ ءَ پد بیگواہ کتگ اَنت-

گیشیں ھالانی رِد ءَ بلوچستان ءِ تیاب دپی شھر چہ گوادر ءَ پاکستانی پوج ءُ کاؤنٹر ٹیررزم ڈپارنمنٹ ءَ دکان ءَ نندوکیں یک ورنایے آوار جنگ ءَ پد وتی ھمراھی ءَ برتگ بیگواہ کتگ-

بلوچ یکجھتی کمیٹی ھاران ءَ وتی درشان رِد ءَ ھاران ءِ جھمنندیں نصیب اللہ ء حاجی نزیر احمد کلی چبی ءِ سیادی داروکیں ورنا چہ گوادر ءَ پاکستانی پوج ءَ گوادر گرائمر وانگجاہ ءِ دیم ءَ چہ پرچون دکانے ءَ زورانسری بیگواہ کتگ-

بی وائی سی ھاران رِد ءَ نصیب اللہ یک گریبیں دکاندارے گوستگیں روچاں گوادر ءَ راجی مچی ءِ میان ءَ دکان پچ کنگ ءِ پُشدر آ بیگواہ کتگ-

گل ءُ کھول ءَ لوٹ کتگ کہ نصیب اللہ بلوچ ءَ زوت دیم ءَ بیار اَنت ءُ یل بہ کن اَنت اگاں ناں تُرندیں زھرشانی کنگ بیت-

دومی نیمگ ءَ کراچی ءِ دمگ لی مارکیٹ ءَ پاکستانی چیریں ادارھاں دو ورنا آوار جتگ ءُ بیگواہ کتگ اَنت-

گیشییں ھالانی رِد ءَ کراچی ھشت چوک ءَ گوستگیں شپ ءِ نُھ نیم ءَ نزیک ءَ کراچی پولیس ءُ پاکستانی چیریں ادارھانی کارمنداں حسنین ء خالد جھمنند بلوچ آباد کیچ مند ءُ رحمان ء اسلم جھمنند پیشین روکپتی بلوچستان آوار جتگ ءُ ناشناسیں جاھے ءَ برتگ اَنت-

کھول گوشگ رِد ءَ دمگی تھانہ ءَ اے نودربرانی درگت ءَ سرپدی زورگ ءَ شتگ ایں اود ءَ پولیس ءَ گْوشتگ من سرپد نہ آں چیریں ادارھاں چست کتگ-

کھول گوشگ اِنت کہ دوئینانی پون نمبر ءَ کمو دیر ءَ پچ بنت ءُ پد بے توار بنت-