ٹمبر ماپیا ءَ جنگلانی گُڈّگ بند کنگی اِنت، اگاں ناں آیانی ھلاپ ءَ ترندیں گامگیج زیرگ بیت اِنت ۔ بی ایل ایف

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءِ تہ ءَ ٹمبر ماپیا ءَ را بیھار داتگ کہ آ جنگلانی ھلاس کنگ ءَ بند بہ کن انت یا ایشانی ھلاپ ءَ ترندیں گامگیجے ءِ دیمپان بہ اَنت۔ جنگلات ءِ گُڈگ ءَ ھواریں مردماں بی ایل ایف ءِ نیمگ ءَ دزگیری، مزنیں جرمانگ ءُ مالی ءُ جانی تاوان ءِ آماچ بوت کن انت۔

جارکش ءَ گوشتگ جاڑی اَمل ءِ سر ءَ لھتیں وھد ءَ چہ نزیکی ءَ چہ نگرانی کنگ بوتگ ءُ اے کار ءِ پُشت ءَ ھواریں درستیں مردم، دری ٹھیکیدار ءُ دور ءُ دری مردمانی پجار کنگ بوتگ انت۔ بی ایل ایف ءَ باز رند ءَ اے گپ پدّر کرتگ کہ اے گل بلوچستان ءِ مڈیانی لُٹ ءُ پُل کنگ، پیش (مُزری) ءِ مزن کچ ءَ کاروباری کارمرز کنگ ءُ جنگلی زند ءِ شکار کنگ ءَ موکل نہ دنت وتی جند ءِ کاراں زوت بند کن اِت-

جارکش ءَ گوشتگ راج ءِ شکایتانی سر ءَ سرپدی رس اتگ کہ لھتے مردم کُنچتی، بشولی، کوھک، کڈان ءَ بگر داں میدانی دمگ جان محمد بازار ءَ جنگلاں مزنیں کچے ءَ کشگ ءَ اَنت۔ درچک ءِ گڈگ ءِ ھاتر ءَ دری مردمانی ٹھیکیداراں گوں سودا کنگ بوگ ءَ انت۔ بلوچستان ءِ جنگل راجی میراس انت یک مردمے یا یک ٹَکّے ءِ میراس نہ انت آ اے جنگلانی یک تاکے ءِ ھم پہ سوداگری کنگ ءَ نہ دنت۔ ھما مردم کہ بلوچستان ءَ یلہ داتگیں مردم لیک اَنت ءُ اے ردیں کار ءَ ’بزنس‘ جوڑ کتگ، اے گپ ءَ شموشکار مہ بنت کہ بلوچ راجی نپانی پَھریزوک ادارہ ھست اَنت۔

جارکش ءَ گوشتگ بی ایل ایف بلوچ راج ءِ ھما تاکت اِنت کہ پہ بلوچ راجی نپاں راجمانی واھشتانی ھساب ءَ کارمرد کنگ بیت ءُ ما نہ لوٹ ایں کہ اے راجی تاکت چہ اسل دژمن ءَ دگہ جاگہ ​​ءَ کارمرد کنگ بہ بیت یا بھر ءُ بانگ کنگ بہ بیت پمیشکا چہ کُل سرپدیں مردماں دزبندی کتگ کہ آ بلوچستان ءِ جنگل، جنگلی زندمان ءُ چاگرد ءِ رکّینگ ءِ واست ءَ یک توارے بہ بیت دانکہ ایشی ءِ گر ءُ دار ءَ مارا زور ءِ کارمرز کنگ ءِ زلورت مہ بیت۔

جارکش ءَ گوشتگ موسمیاتی بدلی سرجمیں دنیا ءِ ھاتر ءَ یک چیلنجے ءِ بستار ءَ ھست اِنت۔ بلوچستان ءَ ایشی ءِ زاھریں سان ھر سال ءِ ھورانی تہ ءَ سیلاب ءِ دروشم ءَ گندگ ءَ کیت، جنگلانی ھلاس کنگ ءِ آسر ءَ جاور ھراب تر بنت۔ بلدکاریں ءُ موسمیاتی بدلی ءِ چاروک گندگ ءَ انت کہ بلوچستان ءَ درچک کشت ءُ کشار ءَ مزنیں کمی یے اتکگ۔ پاکستان آرمی بلوچستان ءَ جنگلانی سُوچگ ءَ ھم دست مان اِنت ءُ ھما کرّمانی مستریں اسپانسر اِنت کہ جنگلانی کشّگ ءَ گوں ھمگرنچ اَنت۔

جارکش ءَ گوشتگ بلوچ لس مھلوک ءَ موسمی بدلی ءَ ھوار ھمک پڑ ءَ وتی جنگ کنگی اِنت۔ مارا درچک ءِ مزن کچ ءَ گُڈّگ ءِ بدل ءَ درچک کِشّگ ءِ زلورت انت، بلوچستان ءِ بنجاھی ادارہ ءُ مہھوک ھم چاگرد ءُ جنگلی زند ءِ رکینگ ءِ ھاتر ءَ اے کمپین ءَ ھمراہ داری بہ کن انت۔

میجر گوھرام بلوچ ءَ گوشتگ اے ماپیا ءِ گڈی سرپدی بیھار اِنت کہ جنگلانی ھلاس کنگ ءَ زوت بند بہ کنت اگاں ناں آ وتی مالی ءُ جانی تاوان ءِ زمہ وار وت بہ بنت-