نبشتانک: راجی مُچی ءِ زُرمبشت
نبشتہ کار: زھیر بلوچ
دی بلوچستان پوسٹ
بابا ءِ بلوچ نواب ھئیر بکش مری ءَ گُشتگ اَت کہ زورگیر ءِ بگیری ءَ پاد آیگ ءَ ھمنچو وھد جن ئے دو ھمنچو تاوان بار بہ ئے۔
چوناھا ءَ گوستگیں ھپتاد ءُ پنچ سال ءَ بلوچ ڈیھ ءِ سر ءَ زورگیریں پاکستان بلوچ راج ءَ بے توار کنگ ءُ وتی زورگیری ءَ مھکم کنگ ءِ ھاتر ءَ زور جنگ ءَ انت۔ اے ھپتاد ءُ پنچیں سالانی توک ءَ زورگءُریں استان ءَ بلوچ ءِ سر ءَ یک نیمگے لشکر کشی ءُ کُشت ءُ کوش ءِ رِد برجاہ داشتگ دومی نیمگ ءَ دنیا ءَ را ھمے پیش دارگ ءِ جھد کتگ کہ بلوچ راج منی گوں ماں وشھال انت ما بلوچ ءَ را دیمروی دیگ ءَ ایں۔ بس لھتیں سردار ءُ مردم انت کہ دیمروی ءِ منوگر نہ انت ءُ مئے دیم ءَ اڈاند ودی کنگ ءَ انت۔ بزاں زورگِیر ءِ پندل ھمے بوتگ کہ یک نیمگے بلوچ راجی جُنز ءَ ایرماد بہ کنت دومی نیمگ ءَ وتی لُٹ ءُ پُل ءَ برجاہ بہ دار ایت۔
بلوچستان ءِ سر ءَ زورگیری ءَ پد زورگیریں استان ءِ اولی گامگیج بلوچ ءِ چُکچینی بوتگ کہ آ وڑے ناں وڑے ءَ زورگِیریں لشکر ءَ ناں ایوک ءَ برجاہ داشتگ بلکیں اے دِرچ ءِ تہ ءَ روچ پہ روچ تُرندی آؤرتگ کہ روچ ءِ مروچی برجاہ انت۔ اے چُکچینی ءِ تہ ءَ بلوچ ءِ جان ءُ مال ءَ ھوار بلوچ ءِ گِس، کار ءُ روزگار، دود ءُ زبان، نّنگ ءُ ناموس ءَ ھوار بلوچ ءِ ھمُک روچی زند تباہ کنگ بوتگ۔ ورناھانی آوارجنی ءُ ژانگولیں لاشانی دور دیگ ھمُک روچی کارے جوڑ بوتگ۔ بلوچ ماتانی کشگ ءُ دگانی سر ءَ چیھانٹاں آزمان جُمبینتگ بلے اے زورگیریں استان ءِ گوش ءَ مورے اوں نہ وارت۔
بلوچ راج ءِ یک مزنیں سپتے اِش انت کہ بلوچ ءِ تہ ءَ راجدوستی ءُ زمین دوستی چہ شاگیں گوانزگ ءَ ھوار انت۔ پہ وتی گُلزمین ءِ ھاتر ءَ دیمونی دیگ ءُ زورگریں زوراکانی دیم ءَ گھگیری کنگ بلوچ ءِ ھون ءَ ھوار اِنت۔ ھمے سبب انت کہ زورگیریں پاکستان ءِ اینچو زوراکی ءَ پد ھم بلوچ راجی جُنز پہ سوبمندی وتی گاماں جُنزان انت زورگیریں لشکر ءَ اینچو کُشت ءُ کوش ءَ پد ھم بلوچ پروش دات نہ کتگ۔
مرچی بلوچ راجی جُنز ھستیں وھد ءِ لوٹ ءُ گُزرانی گوں ماں دیم ءَ جُنزان انت ءُ بلوچ راجی مُچی ءَ راجی جُنز ءَ را یک نوکیں دروشُمے دات۔ وھدے بلوچ راجی مُچی ءِ جار ماں گوادر ءَ جنگ بوت گُڑا زورگیریں استان ءُ آئی ءِ کاسگ چٹاں آس ماں پشک ءَ کپت۔ آیاں گنوکی ءَ گپت۔ چیا کہ گوستگیں بیست سال انت پنجابی ریاست گوں چین ءِ ھمراھی ءَ گوادر ءِ تہ ءَ وتی پایدگانی واستا مزن مزنیں پروجیکٹانی سرا کار کنگ ءَ انت۔ سی پیک(ون بیلٹ ون روڑ ءِ پالیسی) ءُ ایدگہ مزنیں لُٹ ءُ پُلی پروجیکٹانی نام ءَ بلوچ ءَ چہ وتی زمین ءِ سر ءَ در پہ در کنگ ءَ انت۔ سی پیک ءِ نام ءِ سر ءَ گوادر ءَ دری پنجابی ءُ چینی آرگ ءُ آباد کنگ بوگ ءَ انت ءُ گوادر ءِ اُلس وتی جند ءِ زمین ءِ سر ءَ باروٹی کنگ بوگ ءَ انت۔ بزان گوادر ءِ مھلوک ءِ روزگار چہ آیاں پُلگ بوگ ءَ انت آ پہ ترمپ ءِ آپ ءَ تلوسگ ءَ انت ناں آیاں شریں نادُراہ جاہ ھست نَیکہ ایدگہ زند ءِ بُنکی آسراتی ھست انت۔ بلے دومی نیمگ ءَ ھمے دری مھلوک کہ گوادر ءَ آباد کنگ بوگ ءَ انت اشانی سرجمیں لوٹ سرجم انت۔ بیست ءُ چار ساھت آیانی کِر ءَ لین ھست۔ آیانی واستا شریں نادراہ جاہ ءُ وانگجاہ جوڑ بوتگ۔ آیانی واستا آپ ءُ ایدگہ بُنکی آسراتی ھست انت۔
نوں وھدے زورگیر ءَ زانت کہ راجی مُچی دنیا ءِ دیم ءَ مئے سرجمیں پندلاں پَدّر کنت گُڑا زورگِیر ءَ بلوچ راجی مُچی ءِ بے سوب ءَ کنگ ءَ وتی زور کارمرز کُت۔ راجی مُچی ءِ ھمُک ھند ءُ دمگ ءِ کاروان دارگ بوت انت۔ آیانی سر ءَ زوراکی کنگ بوت۔ مستونگ، نوشکی، تلار ءُ اوتھل ءَ راجی مُچی ءِ کاروانانی سر ءَ زورگیریں لشکر ءَ اُرش کُت بازیں ورنا ءُ زالبول ٹپیگ بوت انت ءُ سے ورنا شھید کنگ بوت۔ بلے زورگیر ءِ اینچو زوراکی ءَ پد ھم ما دیست بلوچ راج گوں تپاکی ءَ اوشتاتگ گھگیری کنگ ءَ انت زوراکیں لشکر ءِ تیرانی دیم ءَ پہ وتی گُلزمین ءَ اوشتاتگ۔ وتی راج ءِ کُمک کنگ ءَ انت۔ کسے کاروان ءِ مردماں آپ دیگ ءَ انت کسے نان ءُ وردن کسے گِس ءَ جاگہ دیگ ءَ انت۔ ما دیست کہ بلوچ سرجم ءَ راجدوست جوڑ بوتگ۔
سرجمیں بلوچستان راجی مُچی ءِ زُرمبشت ءَ پاد اتک ءُ وتی راجی چُکچینی ءِ بگیری ءَ توار چست کنگ ءَ انت۔ زورگیر ءَ راجی مُچی ءِ کاروان بگند ئے گوادر ءِ روگ ءَ داشت انت بلے مرچی تھنا گوادر ءَ ناں بلکیں سرجمیں بلوچستان ءَ راجی مُچی بوگ ءَ انت۔ گوادر ءَ سینزدہ روچ ءَ گوں سوبمندی ءَ راجی مُچی ءَ نندانک دات گوادر ءِ اُلس ءَ اے نِندانک ءِ تہ ءَ بھر زُرت روچ ءُ شپ ھمراہ بوت انت ءُ دنیا ءَ را پیش داشت کہ گوادر ءِ راستیں دروشُم اِش انت دگانی سر ءَ نشتگ۔ گوادر ءِ مھلوک وتگڑیں دیمروی ءِ ھاتر ءَ ریپینگ بوتگ ما اے زوراکیں استان ءَ نہ لوٹ ایں ما وتی راجی پجار ءَ لوٹ ایں۔ گوادر ءَ راجی مُچی ءِ سوبمندی ءَ پد مرچی سرجمیں بلوچستان ءَ اے کاروان جُنزان انت ءُ بلوچ راج ءَ زانت ءُ سما دیگ ءَ انت کہ ایردستی ءِ بگیر ءَ ھر وڈ ءَ توار چست کنگی انت۔
بلوچ یکجہتی کمیٹی ءِ رھشون ڈاکٹر مھرنگ بلوچ، ڈاکٹر سبیہ بلوچ، سمی بلوچ، شاہ جی بلوچ ءُ آیانی سنگتانی جھد ءِ برورد ءَ مرچی نوکیں زُرمبشتے ءَ بلوچستان جکسینتگ ءُ بلوچ راج تپاک ءُ یکجاہ کتگ۔ مرچی زورگیریں پاکستان ءِ ھوار سرجمیں دنیا ءِ چم بلوچستان ءُ بلوچ راجی جُنز ءَ سّک انت۔ اے بلوچ راجی مُچی ءِ مستریں سوبمندی انت۔
لُمہ ءِ وتن شھید بانُک کریمہ ءِ جھد ءِ برورد ءَ مرچی بلوچ زالبولاں راجی جُنز ءِ بار وتی کوپگاں زُرتگ ءُ براتانی ھمگام انت۔ لُمہ ءِ وتن شھید بانُک کریمہ ءِ مدام ھمے واب بوتگ کہ بلوچ زالبول راجی جُنز ءِ پِڑ ءَ وتی کِرد ءَ پیلو بکن انت۔ مرچی من دلجماں کہ لُمہ ءِ ارواہ آسودگ انت ءُ وتی راج ءِ شیرزالیں زالبولانی سر ءَ پھر بندگ ءَ انت۔ من پہ ستک ءُ دل گُش آں کہ زورگیریں استان نوں ھمنچو زور بہ جنت بلے بلوچ راج ءَ ایردست ءُ داشت نہ کنت۔
مرچی بلوچ یکجہتی کمیٹی ءِ راجی مُچی ءِ زُرمبشت ءَ راجی جُنز ءِ تہ ءَ مادنیں کشکے رستگ۔ دُوا انت کہ اے کشک انچو رُژن ءَ بات ءُ راجی شھیدانی واب سرجم بات۔ بلوچستان آجو بات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت