مروچی من ءَ پھر اِنت اے مُچی ءَ راج راجی لوٹانی ھاتر ءَ سوگندی ءَ جاڑیگ انت – ماہ رنگ بلوچ

شال ءَ بلوچ یکجھتی کمیٹی ءِ کاروان ءِ سر بوگ ءَ شال ءَ بازیں کچے ءَ مھلوک ءَ وش اتکی کتگ –

بی وائی سی ءِ سروک ڈاکٹر ماہ رنگ بلوچ ءِ کاروان دگہ رھشونانی ھواری ءَ سر بیتگ ءُ اود ءَ شاھوانی اسٹیڈیم سریاب ءَ مُچی ترانی مراگشے برجم دارگ بیتگ کہ اود ءَ مھلوک گوں اوگاماں مُچ بیتگ-

گوادر ءَ زھرشانی نندانک ءِ ھلاس بوگ ءَ پد تربت، پنجگور، گریشہ، سوراب، کلات ، منگچر ءُ نوشکی ءَ گوزان ءُ شال ءَ راجدپتری مُچی ءِ وش اتکی بیتگ – کہ ایشی ءَ مھلوک ءَ بازیں کچے ءَ بھر زرتگ ءُ بلوچ یکجھتی کمیٹی ءِ گون ءَ ھمسنتی درشان کتگ-

بی وائی سی ءِ سروک ڈاکٹر ماہ رنگ بلوچ ءَ تران کنان ءَ گوشتگ مئے زندان ءُ بیگواھیں مردمانی پیسلگ ءَ بلوچ راج کنت اِنت ءُ شال ءِ مھلوک ءِ ھمت ءُ بھادری ءَ دروت ندر کن آں –

آئی ءَ گوشتگ شُمئے ھمت اے جد ءُ جھد ءَ پروشگ ءَ نئیل ایت من ءَ بلوچ راج ءِ جنک بوگ ءَ پھر اِنت کہ من ءَ مھروان ءُ اوپار کشیں راجے دزکپتگ کہ پشت ءِ روگ ءَ نہ زانت اِنت ءُ دیم ءَ روگ ءِ جنزگ ءَ زانت بلوچانی منزل دوسد سالاں داشتگیں منزل اِنت ءُ آئی ءِ نیمگ ءَ جنزگ ءَ اِنت من ءَ شُمئے سر ءَ پھر اِنت-

مروچی شمارا درستاں کول ءُ کرار کنگی اِنت ھزاراں مشکل ءُ ترندی ءَ ابید شمارا دارگی نہ اِنت – مروچی ءَ چہ ھپت ماہ پیش ما اے جاہ ءَ جاڑیگ بوتگ انت ءُ ھمے اسٹیڈیم پُر بیتگ ءُ من گشتگ ات بلوچ راجی گھگیری ءَ ھوار بہ بیت مروچی شش ماہ ءَ رند من گشاں من ءَ پھر اِنت مھلوک وتی سوگند وری ءَ اوشتاتگ انت – مھلوک ءَ گوشتگ بلوچ راج جزباتی اِنت پشت ءَ روت اِنت بلے آیاں گوشگ لوٹ آں بلوچ ھچبر جزباتی نہ بیتگ بلوچ پہ زانت ءُ سسا ءَ جنزگ ءَ اِنت –

آئی ءَ گوشتگ بلوچ راج ءِ ھونانی گون ءَ گپ جنگ ءُ بھاگیری کنگی نہ اِنت بلوچ یک رندے کول کنت گڑا پشت ءَ نہ کنز ایت – مروچی بلوچ راجی مُچی ءِ ستاشانی سرجمیں دنیا ءَ بوگ ءَ اِنت مروچی ریاست ابکہ اِنت بلوچ راج ءَ را پشت کنزگ ءِ جھد ءَ بیتگ بلے مروچی بلوچ راج دیم ءَ اوشتاتگ – زالبولانی گیرت لپاشگ بیتگ، مردین بندیگ کنگ بیتگ اَنت بلوچ ورنا نشہ ءِ آماچ کنگ بیتگ اَنت – دھکاناں چہ آیانی زمین پچگرگ بیتگ اَنت بلوچ دریا ورداں آیانی زر پچگرگ بیتگ ءُ دو وھد ءِ نان ءَ مھتاجی ءِ دیمپانی بہ بیت دانکہ بلوچ راج اوشت ءِ آماچ بہ بیت بلے ایشاں ابید بلوچ جنزگ اتگ مروچی ءِ ایشی ءِ سبب مئے گھگیری اِنت ءُ شھیدانی ھون ءِ گون ءَ ھپت ماہ پیش زرمبشت مٹ بوتگ-

مروچی بلوچاں راست کتگ بلوچ جنگ ءِ واستا وتی ساھاں دنت اِنت ھمے ڈول ءَ سیاسی زرمبشت ھم وتی جان ءَ دات کنت اِنت- ایوک ءخ پاکستان بلکیں سرجمیں ایشیا ءُ دنیا ءَ یک ھنچیں زرمبشتے چِست بیتگ کہ اے زرمبشت ءَ دیستگ ات ءُ دنیا ھیران بیتگ بلوچ ابید مڈی ءَ یک ھنچین تاکت وریں ھونواریں ریاستے کہ بس تاکت ءِ کارمرد ءَ زانت اِنت ءُ ایشی ءَ ابید آ پشت ءَ پرچا نہ کنز ایت-

آئی ءَ گوشتگ وھدیکہ مئے کاروان چہ گوادر ءَ دراتکگ سرجمیں بلوچستان ءَ ھر ھما جاہ ءَ مھلوک ءَ بازیں کچے ءَ مئے وش اتکی کتگ ءُ مھر داتگ ھما مات وتی کُڈکاں دراتکگ ءُ مارا نیک دوائی اش کتگ ءُ کلوہ اش داتگ ءُ مئے شھیدانی زرمبشت یکجاہ بیتگ ءُ آیاں سوگند وارتگ ما وتی منزل ءَ الم سر بہ ایں –

آئی ءَ گوشتگ بلوچ یکجھتی کمیٹی تئی سر ءَ ستک کنگ ءِ منت اِنت بلوچ یکجھتی کمیٹی ءِ زرمبشت بلوچ راج ءِ نسل کشی ءِ ھلاپ اِنت ءُ بلوچ یکجھتی کمیٹی ءِ یکیں مکسد اِنت کہ آ بلوچ راج ءَ یکجاہ کنت اِنت ءُ ھما بلوچ چاگی ءَ اِنت مکران ءَ اِنت یا سیستان ءَ اِنت آیانی ھما زُلم ءُ گیشی بوگ ءَ اِنت ءُ آ دیم ءَ آرگ بنت اِنت ءُ آیاں ما سرجمیں دنیا ءِ دیم ءَ پدر کن ایں –

آئی ءَ گوشتگ اے زرمبشت ءِ سروکی ءَ بلوچ راج کنگ اِنت اگاں زرمبشت سوبمند بیتگ گڑا شمئے سبب ءَ بیتگ اگاں من گوادر ءِ مھلوک ءِ گپاں مہ کن آں گڑا آیانی گون ءَ نا انساپی یے ھما وھد ءَ سرجمیں بلوچستان ءِ دگ بند کنگ بیتگ اَنت ءُ بیست ءُ ھشت جولائی ءَ گوادر ءَ کرفیو جنگ بیتگ ءُ سرجمیں گوادر ءِ شھر ءَ پوجی اوشتوک ءُ پٹ ءُ پول ءَ بیتگ اَنت مھلوک اش ڈن ءَ نیشتگ انت ھما وھد ءَ بلوچ زالبول ءُ بلوچ ورنا ڈن ءَ درکپتگ انت ھما دریا ورد وتی لوگاں درکپتگ اَنت ھما وھد ءَ آنسو گیس ءأ تیرگواری بیتگ ءُ گوادر ءِ مھلوک اوشتاتگ انت – سیزدہ روچ ءَ گوادر ءَ ورگی آپ نہ بیتگ ءُ دراھیں راہ ءُ دکان بند کنگ بیتگ اَنت ءُ مھلوک ءَ اچ وت ءَ وردنی آورتگ اَنت اے ھمے زرمبشت ءِ سوبمندی انت-

آئی ءَ گوشتگ پوجی رھسری بنجلاں کہ مئے کمشرپی بیتگ کجا روگ ءَ ئے کجا آیگ ءَ ئے مروچی ھما بنجل والا بلوچ راج ءَ چہ ترسگ ءَ اَنت آ یکوئی جست کن اَنت کہ راجی مُچی ءِ کاروان کجا داں سر بیتگ ھمے مئے سوبمندی اِنت اے یک راجی زرمبشتے وھدیکہ مھلوک چِست بیت اِنت گڑا ھپت لک پوج ناں ھپت ارب پوج ھم ایشانی راہ ءَ داشت نہ کنت اِنت گوستگیں ھپتاد سالاں ریاست ھمے کنگ ءُ پیداک اِنت کہ بلوچاں وت ماں تی میڑ ءَ بہ میڑاناں، نشھی بہ کناں، بے روزگار بہ کناں بلوچ کجام ھم رنگ ءَ یکجاہ مہ بیت اِنت- ایشی ءَ شری ءَ زانت تاکت مھلوک ءِ گور ءَ اِنت –

آئی ءَ گوشتگ ھمے واستا گشاں وھدیکہ گوادر ءَ بلوچ یکجھتی کمیٹی ءِ کماش ابید انٹر نیٹ ءَ یرگمال بیتگ اَنت گڑا سرجمیں بلوچستان بلوچ راج ءَ بند کتگ سرجمیں بلوچستان ءِ مات ءُ گوھاراں زھرشانی نندانک داتگ پاکستانی وزیر ءُ اے سی ڈی درشتان زھرشانی نندانکاں شتگ انت ءُ ترسینگ ءِ جھد اش کتگ بلے مئے براتاں وتی ساھانی پروا نہ کتگ ءُ یک داب ءَ مِک بیتگ اَنت ءُ بلوچ راج ءَ آیانی ترس پادانی چیر ءَ لگت داتگ انت شما سوبمند ات ءُ شمئے سوبمندی داں سرجم ءَ روت اِنت-

آئی ءَ گوشتگ بلوچ وتی جنکیں زھکاں الم بہ وانین ایت ءُ آیاں سرجمی ھک بہ دنت پرچا کہ یک ماتے زانت ءُ سسا وتی زھگ ءَ رودینت کنت ءُ راج ءِ کرداں سرجم کت کنت اِنت ءُ مروچی مئے زرمبشت ءَ مئے مات ءُ گوھار دیم ءَ جنزینگ ءَ اَنت-