یازدہ اگست : بلوچستان ءِ جتاجتائیں شھراں بلوچستان ءِ بیرک منڈگ ءُ دیوال نبشتگ کنگ بیتگ انت

شپ ءِ وھد ءَ ناشناسیں مردماں جتاجتائیں شھراں پاکستان بگیر ءَ دیوال نبشتہ کنگ ءُ بلوچستان ءِ بیرک منّڈگ بیتگ-

یازدہ اگست ءَ انچش بلوچ آجوئی لوٹوکیں پارٹیانی نیمگ ءَ چہ برتانیہ ھاکمی ءَ چہ آجوئی روچ برجم دارگ بیت ھمے درگت ءَ شپ ءِ وھد ءَ ناشناسیں مردماں بلوچستان ءِ آجوئی لوٹوکیں پارٹیانی نیمگ ءَ درچتگیں بیرک ءِ منّڈگ ءُ سرمچاراں ءُ شھیدانی یات ءَ دیوال نبشتہ کنگ بیتگ-

شپ ءِ وھد ءَ بلوچستان ءِ دمگ ھُزدار ءِ تھسیل زھری ءِ جتاجتائیں دمگاں ءُ ٹیلیپون ٹاورانی سر ءَ بیرک منّڈ اِتگ اَنت وھدے کہ بلوچ لبریشن آرمی ءِ پلامرزی ءَ جتاجتائیں ھندانی سر ءَ دیوالی نشبتہ کنگ بیتگ-

ھمے میان ءَ ناشناسیں مردماں بلوچ لبریشن آرمی ءِ بولان اُرش ءَ ھوار نمیران بیتگیں پدائی حافظ زیشان ءُ بی ایل اے ءِ نمیران بیتگیں کماندار ضیاء زھری ءِ گُڈی وابجاہ سر ءَ ھم بلوچستان بیرک منّڈگ بیتگ-

دومی نیمگ ءَ چہ نوشکی ءَ ھال اِنت کہ شپ ءِ وھد ءَ شھر ءِ جتاجتائیں ھند ءُ ٹیلیپون ٹاورانی سر ءَ بیرک منڈگ بیتگ وھدے کہ بلوچستان ءِ بُنجاھی شھر شال ءَ ھم بیرک جتاجتائیں ھندانی سر ءَ منڈگ بیتگ-

ھمے میان ءَ جتاجتائیں شھراں پاکستان ءِ بگیر ءُ بلوچستان ءُ بلوچ سرمچارانی ءُ بلوچ لبریشن آرمی ءِ پلامرزی ءَ دیوالی نبشتہ کنگ بیتگ-