بلوچستان ءِ دمگ مستونگ ءَ ناشناسیں مردماں تیرگواری ءَ چہ ڈپٹی کمشنر پنجگور ذاکر بلوچ بیران بیتگ وھدے کہ ڈسٹرکٹ پنجگور ءِ چیئرمین ٹپی بیتگ-
تیرگواری ءِ وئیل مستونگ ءِ دمگ کڈکھوچہ ءِ ھند سر ءَ بیتگ کہ اود ءَ نیشنل پارٹی ءِ راھشون ایم پی اے رحمت صالح ءِ برات ءُ ڈسٹرکٹ چیئرمین پنجگور عبدالمالک ءُ ڈپٹی کمشنر پنجگور ذاکر بلوچ ٹپی بیتگ-
ٹپی بیتگیں مردم نواب غوث بخش بزنجو نادُراھجاہ ءَ برتگ بلے ڈپٹی کمشنر پنجگور ذاکر بلوچ ءَ ٹپانی درد نہ سگ اِتگ ءُ بیران بیتگ-
دومی نیمگ ءَ اھوالکار رِد ءَ مستونگ ءِ دمگ کھڈکوچہ ءَ ٹک ءِ ھند سر ءَ کراچی شال ءِ بُنجاھی شھدگ سر ءَ مزنیں کچے ءَ سلاہ بندیں مردماں بستگ ءُ ھمے میان ءَ گاڑیانی پٹ پول برجاہ بیتگ کہ ڈی سی پنجگور ءُ چیئرمین پنجگور ءِ کاروان ءَ ھوار لیویز ءُ پولیس فورس ءِ سلاہ بندانی میان ءَ میڑ بیتگ کہ اود ءَ بازیں مردمے ٹپی بیتگ اَنت-
بلے تنی وھدے اُرش زمہ واری ھچ گل ءَ نہ زرتگ-