نبشتانک: بے آسریں زند، ما ،ءُ چاگرد
نبشتہ کار: سیپ بلوچ
دی بلوچستان پوسٹ
باید وَ همیش اَت ما وتی چاگردے تہ ءَ ماسی کردارے سرا کار بہ کت ایں مئے چاگرد ،جنگ کپتگیں چاگردے همک نیمگ ءَ آس کپتگ ءُ پیشگاه ویران اَنت بلے ما وت ءَ ویرانیانی ندارگ چاروک جوڑ کتگ ، بس همے یکین امیت ءِ آسرا نشتگ ءُ جیڑ ایں پما کسے کیت مارا اے آس ءَ چہ رکین ایت اگاں ما نگاهاں شانک بہ دے ایں بہ چار ایں هچ چشیں آسرے گندگ ءَ نہ ایت کہ آ مئے سرے کپتگیں آس ءَ بہ توس ایت-
پرچا ما وتی چم جهل کتگ انت ءُ گیشیں گلامی ءِ آس ءَ وتا هوار دگہ نسلے ءَ جنجال بہ کن ایں؟ اے شگان باز بر ءَ مردمے جند ءِ زبان ءَ چہ در کیت کہ مئے گوستانک ءَ چشیں بامرد نہ بوتگ کہ اے آس ءِ بہ توسینتیں یا ، بلے اے گپ ءَ ما وتی سرا داں هدے ءَ آورگ ءَ هچ وڑ تیار نہ ایں کہ مارا چہ رند مئے پدریچ کجام آس ءَ سُچ ایت؟-
مئے سر گوں نامرادیں دژمنے ءَ کپتگ ، اے دژمن ءَ نہ ننگ ءِ پگر هست نہ گیرت ءُ لج ءُ میارے ، اے رستر چو هر ءَ مست انت ءُ مئے چادر ءُ چار دیواریاں پار کنت ءُ مئے مات گوهاراں جنت لٹ دنت ، زاه دنت مئے چمانی دیم ءَ مئے پیر ءُ آجزیں کماشاں بیزت کنت ، بلے ما ندارگی ئیں ، ما همک روچ وتی چاگردے تہ ءَ همے ندارگاں گوں دچار ایں ، بلے مئے چماں سیاهیں پٹی ءِ بستگ ، آکر داں کد، ما اے رد پهمی ءَ گوں دچار بہ ایں کہ مئے باریگ نہ ایت ، یا منی باریگ نہ ایت؟-
مرچی بلوچ چاگردے تہ ءَ هما مردماں اے جیڑ ات اوں نہ کتگ کہ مئے پیشگاهاں آس کپ ایت ، همایاں دست سر ءَ انت ، بلے هچ ما انگت هما مَهری ءِ سر مهار گپتگ ، داں کد ؟-
باید ات کہ ما وتی چاگرد ءِ سساهانی سماه در بہ بُرتیں ما وتی چاگرد ءِ انا بہ سمارتیں ، ما وتی لج ءُ میارانی دیم پان بہ بوتین ایں ما وتی زمین ءِ وت رهشونی بہ کتیں ما وتی رهشون ءُ رهدربرانی هم کوپگ بہ بوتین ایں داں وت ءَ آپسرے ءَ سر کتیں ، اے جنگ کہ کپتگ اد ءَ گناه بہ گناه نیست اے لبز بلوچ کساس کنگ ءُ مرگ ءِ هرجان بوگ ءَ انت اد ءَ امیر ءُ گریب یک هساب ءَ چست کنگ ءُ برگ جنگ ءُ کوشگ بوگ ءَ انت ، اے سماه ما دیری بہ کتیں بلے نا ، ما وتی چم داشتگ انت کہ کسے کیت بلے نا اے زمین تئی بکا انت اے تئی گوستانک ءِ چم جهلی ءِ گوش ئے یا انویں ماتوئی کرد بلے تژنے یک هساب ءَ زور ایت ءُ پارلیمنٹ پرستانی چمچھیانی مُز ، بس بے آسر انت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔