آزمانک: ماھکان
نبشتہ کار: ھانی بلوچ
دی بلوچستان پوسٹ
ماھکان مُدام ڈالچار کنگ بوتگ اَت پرچاکہ وھدے ماھکان مات ءِ لاپ ءَ کپتگ اَت ماھکان ءِ پت ءِ واھشت اَت کہ آئی ءِ چک بچکے بہ بیت بلے ماھکان ودی بوت ھما روچ ءَ چہ پد ماھکان ڈالچار کنگ بوتگ اَت۔ یک روچے لوگ ءِ مردُم دُرست گل ءُ شادان اَت اَنت گْوش ئے کسے ءِ سیر اَت یک نیمگے پس ءِ کُشگ بُوگ ءَ اَت، ورگ جوڑ کنگ ءَ اِت اَنت ءُ دومی نیمگ ءَ چاپ ءُ نازینک اَت پرچاکہ مرچی ماھکان ءِ پت ءَ را بچکیں چُکے بُوتگ اَت دُرائیں مردم شادان اِت اَنت، بلے ماھکان یک کُنڈے ءَ نشتگ اَت ءُ مردمانی ندارہ ءَ چارگ ءَ اَت ءُ سک مُلور اَت مرچی کس ماھکان ءِ ھیال ءَ نہ اَت کہ ماھکان ءِ پت ءَ پہ وتی بچ مھران ءَ ھر وڑیں لیبوک آؤرتگ اَت ماھکان ءَ دیست کہ پت ءَ مرچی مھران ءِ واست ءَ لیبوک آؤرتگ گُڑا ماھکان تچان ءَ شُت گُشت ئِے بگندئے پت ءَ منی واست ءَ ھم لیبوک آؤرتگ بلے پت ءَ پہ آئی ءَ ھچ نیاؤرتگ اَت ماھکان سک مُلور ملور ءَ پت ءِ نیمگ ءَ چار اِیت ءُ جیڑگ ءَ بندات کنت۔
ایشی ءَ چہ ابید مھران ءَ من ءَ چہ گیشتر ارزِشت پرچا دیگ بُوگ ءَ اِنت؟
ماھکان وانگ ءَ سک شَر اَت ھر سال اولی لمبر ءَ اتکگ اَت وھدیکہ وانگجاہ ءِ کاراں چہ دست ءَ ھورک بیتگ اَت گُڑا مُدام وتی ھمسروئیں زھگانی گْور ءَ پہ لیب ءُ گوازی ءَ شُتگ اَت وھد جُنزان اَت ماھکان ھم مزن بوان اَت ءُ نی ماھکان ڈن ءِ درآھگ ءَ ھم بند کنگ بوت ماھکان ھیران اَت کہ من ءَ پرچا ڈن ءِ روگ ءَ نیل اَنت مھران ءَ کس ھچ نہ گْوش ایت ماھکان ءَ مات ءَ را جُست کُت کہ من پرچا ڈن ءَ شُت نہ کن آں من زاناں چے کُتگ؟ مھران ءَ کس ھچ نہ گْوش ایت آ وتی سنگتانی ھمراھی ءَ روت من پرچا شُت نہ کن آں؟ مات ءَ درْائینت ءُ گُشت تو جنکے ئے ءُ جنک مزن بنت ڈن ءَ در نیا اَنت ماھکان ءَ گُشت اماں جنک ڈن ءَ پرچا شُت نہ کن آں؟ مات ءَ گوں تُرندیں گالوارے ءَ ماھکان ءَ را ھکل دات ءُ گُشت چُپت کن تو جنکے ئے ءُ جنک باز گپ نہ کن اَنت-
ماھکان ھیران اَت کہ جنک ڈن ءَ شُت نہ کن اَنت ءُ باز گپ ھم کُت نہ کن اَنت گُڑا جنک چے بکن اَنت ؟ گوں وت ءَ جُست ءَ لگ اِت مرچی ماھکان ءِ دومی مکتب ءِ چکاس بوتگ اَت چو مُدامی ءِ وڑ ءَ مرچی ھم ماھکان اولی لمبر ءَ اتکگ اَت چہ وانگجاہ ءِ نیمگب ءَ بازیں سوگاتے ھم ماھکان ءَ رس اتگ اَت ماھکان ءِ برات مھران ھشتمی مکتب ءَ وانگ ءَ اَت بلے آئی ءَ وانگ ءِ ھُب ھچ نیست اَت آئی ءَ مدام وتی وھد سنگتانی ھمراھی ءَ لیب ءُ گوازی ءَ زوال کُتگ اَت چمیشکا آئی ءَ جوانیں لمبر نہ رس اتگ اَت تھنا پاس بوتگ اَت پت باز گل بوت ءُ مھران ءَ را سوگات ھم دات ئِے ماھکان ءَ گُشت اَبّا من اولی لمبر ءَ درتکگ آں پت ءَ گْوشت من تئی اولی نمبر ءَ چے کن آں تو سیر کن ئے دگہ لوگے ءَ روئے مئے واست ءَ کُجام زھم ءَ جن ئے مُپت ءُ ھدا ءَ مئے زَراں زوال کنگ ءَ ئے منی کوپگ وَ مھران بیت اے من ءَ باندا دستاں گِپت ماھکان ءَ درائینت۔ اَبّا من تئی کوپگ پرچا بیت نہ کن آں؟ من واناں، جُھد کناں، داکترے جوڑ باں تئی کوپگ باں۔
ماھکان ءِ پت ءَ گُشت تو ھمینچوک ونتگ بس اِنت نی نِند لوگ ءَ گُد بہ دوچ لوگ ءِ کاراں بہ کن جنک ءَ ھمینچو وانگ بس اِنت ۔
من مھران ءَ مزنیں وانگجاھے ءَ روان دیاں منی گْور ءَ گیشیں زر نیست کہ من ترا بُوانین آں تئی وانینگ ءَ من ءَ ھچ پائدگ نہ رس ایت-
وھدے ماھکان ءَ باز گپ کُت گُڑا ماھکان ءِ پت ءَ ماھکان ءِ مات ءَ را گُشت اے ھمے وانگ ءِ سبب اِنت کہ ایشی ءِ زُبان چو تیز اِنت گیشتر بُوان ایت باندا گْوش ایت منی ھک ءَ بدے جنک ءِ واست ءَ باز وانگ شر نہ اِنت ماھکان ءِ مات لاچار اَت پرچاکہ اے زوراکیں چاگرد ءَ زالبول ءَ را ھچ ھبر پِر نیست زالبول تھنا چُک ءِ پیداک کنگ ءُ لوگ ءِ کارانی کنگ ءِ مشینے لیکگ بیت پمیشکا ماھکان ءِ مات ءَ ھچ ھبر نہ کُت ءُ ماھکان ءَ باز جُھد کُت بلے بے سوب بیت اے زوراکیں چاگرد ءَ نِزوریں ماھکان ءِ گپ ءَ کَے گْوش دار ایت ماھکان ءِ دُرائیں واب ءُ واھشت گُٹگیر کنگ بوت اَنت اے وھد ءَ ماھکان ءِ اُمر شانزدہ سال اَت کہ ماھکان ءِ آروس بوت ماھکان ءِ لوگ واجہ گْوش ئے رسترے، اَت کسانیں ماھکان مُدام آئی ءِ زُلمانی چیر ءَ اَت کدی پہ لَٹ جتگ اَت ءُ کدی آئی ءِ جان داگ داتگ اَت، بلے نی گْوش ئے ماھکان ءَ درد بُوگ ءَ نہ اَت بگندئے آئی ءِ واھشتانی گوم ءَ آئی ءِ دل ھم مُرتگ اَت۔
یک روچے ماھکان ءِ لوگ واجہ ءَ ماھکان سک جَت ءُ ماھکان ءِ سون دات اَنت بلے ماھکان ءِ لُنٹانی سر ءَ یک بچکندگے تالان بوت پرچاکہ مرچی آ آزات بُوتگ اَت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔