پنجاب ءَ بلوچ نودربرانی زورانسری بیگواھی
ٹی بی پی شونگال
بلوچستان ءَ چُشیں یک روچے ھم نہ گوز ایت کہ اود ءِ کجام چہ شھر ءُ میتگاں زورانسری بیگواھیانی ھال دیم ءَ نیاینت ءُ زورانسری بیگواھیانی تہ ءَ درستاں گیشتر ورناہ، سیاسی باسک، نودربر نشانگ کنگ بنت۔بلوچستان ءَ برجاھیں جنگ ءِ زور ءِ تہ ءَ گیشی ءَ پد بلوچ مات ءُ پِتاں وتی چُک مزنیں کچے ءَ اسلام آباد ءُ پنجاب ءِ وانگجاھاں پہ وانگ ءُ زانگ ءَ دیم داتگ اَنت دانکہ آ چہ زورانسری بیگواھیاں بہ رک اَنت بلے گوستگیں دو سالانی تہ ءَ اسلام آباد ءُ پنجاب ءَ بلوچ نودربرانی زورانسری بیگواھیانی تہ ءَ گیشی اَتکگ۔
بلوچستان ءَ مردمی اگبالانی گل ءُ رسانکدرانی نہ بوگ ءِ سوب ءَ پاکستانی واکدار چہ زورانسری بیگواھیاں انکاری اَنت ءُ پاکستان ءِ سرپانکیں مَزن وزیر ءِ گُشگ اِنت کہ تھنا پنجاہ مردم زورانسری بیگواہ اَنت بلے پنجاب ءَ بلوچ نودربراں چہ چہ آیانی شھدربرجاھانی تہ ءَ بیگواہ کنگ بئیگ ءَ اَنت کہ ایشانی منانک ھم ھست اَنت، زاناں آ انگت ھم زورانسری بیگواھیانی سنگینیں جیڑہ ءِ راستی ءَ انکاری بیت؟
پنجاب ءَ بلوچ نودربرانی زورانسری بیگواھی ءُ نسلی پروفائلنگ ءِ سر ءَ “پاکستان ہیومن رائٹس کمیشن ءَ لاھور ءِ شھدربرجاھانی تہ ءَ پاکستانی کانود برجاہ داروکیں ادارگانی بلوچ ءُ پشتون نودربراں ترسینگ ءُ دو نودربرانی زورانسری بیگواھیانی پد ءَ جھلانکیں تُرس ءُ بیمے درشان کنان ءَ گشتگ کہ بلوچستان ءُ پختونخوا ءِ نودربر ھاسیں پئیم ءَ پنجاب ءَ نہ رکیتگ اَنت۔ نودربرانی نسلی پروفائلنگ ءِ آماچ کنگ ءِ اے دود ھلاس کنگ بہ بیت۔ درستیں نودربراں یکیں پئیم ءَ ترسینگ ءُ زورانسری بیگواھی ءِ آماچ بئیگ ءِ ترس ءَ ابید وتی وانگ ءِ برجاہ دارگ ءِ پرمان بہ بیت۔”
پنجاب شھدربرجاہ لاھور ءِ نودربر فرید بلوچ چہ شھدربرجاہ ءِ کمپان ءَ زورانسری بیگواہ کنگ ءِ سر ءَ ترندیں لس پدگرد ءَ پد آ پولیس ءِ دست ءَ دیگ بیتگ ءُ آئی ءِ سر ءَ منشیات ءِ دروگیں کیس لڈگ بیتگ ءُ آئی ءِ دزگیری پدر کنگ بیتگ بلے ایرڈ شھدربرجاہ راولپنڈی ءِ نودربر فیروز بلوچ ءِ زورانسری بیگواھی ءَ یک سالے گوزگ ءُ اسلام آباد مزن آمید گِس ءِ پرمان ءَ پد ھم آ دیم ءَ آرگ نہ بیتگ۔
چہ تربت ءَ چار نودربر بیگواہ اَنت ءُ بلوچستان شھدربرجاہ ءِ دو سالاں چہ بیگواھیں سھیل ءُ فصیح بلوچ ءِ دیم ءَ نیارگ ءِ بگیری ءَ شال ءَ زھرشانی کنگ بئیگ ءَ اِنت۔ بلوچستان ءَ نودربر گیر پھازگی ءِ آماچ اَنت ءُ پاکستان ءِ واکدار زورانسریانی ھلاس کنگ ءَ ابید اے سنگین ءِ جیڑہ ءِ منگ ءَ چہ انکاری اَنت۔ اے جاورانی تہ ءَ جھانی مردمی اگبالانی گلانی زمہ واری گیشتر ود ایت کہ بلوچستان ءِ سنگینیں جیڑہ ءَ گیوار کنگ ءَ پہ وتی کِرد ءَ پیلو بہ کن اَنت۔