بلوچی زبان ءِ نامداریں گُشندہ شوکت سفر ماں پسنی ءَ کل ءُ کسارت کنگ بوتگ

بلوچی زبان ءِ نامداریں گُشندہ شوکت سفر وتی بنکی ھنکین پسنی ءَ ریکپشت مانش جاہ ءَ گوستگیں شپ ءَ کل ءُ کَسارت کنگ بوتگ – آئی ءِ نماز جنازہ چہ پسنی ءَ ڈن مزنیں کچے ءَ مردماں اتکگ ءُ بھر زرتگ ءُ آئی ءِ گڈی دیدار کتگ – وھدیکہ چاگردی ترامجاہ ءَ آئی ءِ اناگتی بیرانی ءِ سر ءَ مردماں دلپدردی درشان اِتگ ءُ آئی ءِ ستک شانی کتگ –

ھدامرزی شوکت سفر ءَ بازیں وھدے بیت کہ جگرانی نادراھی ءِ آماچ بوتگ، نادراھی ءِ گیش بوگ ءِ سوب ءَ ھپتگے ءَ ساری آ ماں کراچی ءَ آرگ ءُ نادراہ جاہ ءَ داکل کنگ بوتگ کہ گوستگیں روچ ءَ بزاں سَے شمبے ءَ آئی ءَ اے کوڈھیں دنیا یل داتگ ءُ وتی ابدی جاہ شُتگ –

گوستگیں روچ ءَ آئی جون چہ کراچی ءَ دیم پہ وتی بنکی ھنکین آرگ بوتگ، کہ ھمے میان ءَ مزنیں کچے ءَ آئی ءِ لوٹوکاں پسنی زیرو پوئنٹ ءَ دگ ءِ سر ءَ اشتاتگ ءُ آ دروت ندر کُتگ – ھمے درگت ءَ ندکار آبد میر ءَ ماں چاگردی ترامجاہ پیس بُک ءَ مردمانی سلامی دیگ ءِ اکس ءِ داتگ ءُ نبشتگ کہ بکول سنگتے ءِ مبارک کازی ءَ ماں مھلوک ءَ دیم ءَ آرگ ءَ مزنیں کردے مکران ءِ ازمکارانی بوتگ کہ آیاں مبارک کازی گوشتگ – مبارک کازی ءِ ھنکین ءِ ازمکارانی تک ءَ شوکت سفر ھم ھوار انت کہ آ نادراہ بوتگ ءُ مروچی اے جھان یل داتگ –

آئی ءَ نبشتگ کہ آئی ءِ جون وھدیکہ پسنی ءَ سر بوتگ گڑا پسنی ءِ مھلوک ءَ ا ھما وڑ شرپ بکش اِتگ ھنچوش کہ مبارک کازی، بانک کریمہ ءُ عثمان لالا دورت ندر کتگ ءُ ھاک ءِ ھوالگ ءَ کنگ بوتگ انت –

آئی ءَ نبشتگ کہ مئے چاگرد ءِ تہ ءَ اے نوکیں رنگے چد ءُ پیسر مئے چاگرد ءَ اے وڑ شائر، لبزانت، ازمکار سلامی نسیب ءَ نہ بوتگ – وشی ءِ گپ اش انت کہ اے وت مھلوک ءِ تہ ءَ اتکگ ءُ ھچ گل ءُ پاٹیانی یا ادارھانی نیمگ ءَ کنگ نہ بوتگ ءُ آئی بندات کنوک مکران ءِ مھلوک انت- اے ستاکرزیں رویشت ءِ شال ءَ ھمے رویش برجاہ بات –

بلوچی زیمر ءِ تہ ءَ شوکت سفر مزن شانیں نامے زانگ بیت آئی ءِ اناگتی بیرانی ءَ بلوچستان ءَ ھوار جھان ءِ کنڈ کنڈ ءَ نشتگیں بلوچ کھتیگ انت – ما چاگردی ترامجاھاں آئی ءِ اناگتی بیرانی ءَ بی این ایم انفارمیشن سیکٹری کازی داد محمد ریھان، بابل لتیپ ، بلوچ اسٹودنٹ پرنٹ زابد سالح، صابر فدا ءَ ھوار بازیں مردماں آئی ازم ءِ ستک شانی کتگ ءُ آ دروت ندر کُتگ –

کازی داد محمد ریھان ءَ دلپدردی درشانے ءَ نبشتگ کہ ‏چیزے روچ ساری شوکت سپر ءِ نادْراھی ءِ ھال اش کرت ، لوٹ اِت سلام ءُ توارے راھی بہ کن آں ، مروچی اے ھال اِنت کہ شوکت چہ ما سستگ ءُ بیران بیتگ – شوکت سپر بلوچی زبان ءِ شریں گشندھے ءِ پجیگ ءَ مھروانیں مردمے اَت ، جتائیں توار ءُ دابے ءِ واھند اَت بیرانی ءَ دلپدرد آں۔

آدم حقانی اکیڈمی آواران ءَ وتی دلپدردی درشانے ءِ تہ ءَ نبشتگ کہ شوکت سفر ءِ وڑیں وش تواریں گٹکار،گُشندہ، ءِ بیرانی پہ بلوچی ساز ءُ زیمر ءِ پڑا بلاھیں تاوان یے –

بلوچ گشندہ صابر فدا ءَ نبشتگ کہ شوکت سفر اناگتی بیرانی ءَ سرجمیں جھان ءِ بلوچ پرسیگ انت آئی ءِ بیرانی ءَ ما چہ یک ایمانداریں سنگتے ءَ زبھر بوتیں –

زابد سالح نبشتہ کنت کہ بلوچی زُبان ءِ نامداریں گُشندہ شوکت سپر ءِ بیران بوگ ءَ سک دل پدرد بوتاں بلوچی زیمر ءِ تہ ءَ واجہ ءِ یک بلاھیں کردے بوتگ آئی ءَ گوں وتی وشیں زُبان ءَ ھر وھد ءَ بلوچ ءُ بلوچی زُبان ءَ گوں مھر بوتگ، آئی ءِ اِزمکاری کدی مئے دلانی تہ ءَ گار نہ بیت ھر وھد ءَ گوں وشیں لبزاں یات کنگ بیت-

عادل گچکی نبشتہ کنت کہ بلوچ ءُ بلوچستان چوناھا پرسیگ اِنت بلے پسنی گشے ویران ءُ ابیتکی ءُ ملوری ءِ رنگ ءَ جنگ ءَ اِنت – ادا نورخان گپ بیت گشے بیست سال ءِ گپ تازہ بنت دومی نیمگ ءَ کازی ءِ یات انگت دل ءَ در نہ اتکگ انت پدا مرچی ساز ،گال، توار، شئر دراھیں ساز استاد شوکت سفر ءَ گوں وتی سفر ءِ ھمراھی ءَ برتاں گوں –