بلوچستان ءِ بنجاھی شھر شال ءَ ڈاکٹر تاج رئیسانی ءِ میان اُستمانی آزمانکانی براھوئی رجانک ءِ کتاب “وئیروئی بینٹ” دیمدرائی دیوان برجم دارگ بوت۔
براھوئی زُبان ءِ نامداریں لبزانت ڈاکٹر تاج رئیسانی ءِ نوکیں کتاب “وئیروئی بینٹ” کہ میان اُستمانی لبزانک ءِ آزمانکانی براھوئی رجانک اِنت، آئی ءِ دیمدرائی ءِ دیوان ماں بلوچستان یونیورسٹی ءِ براھوئی ڈیپارٹمنٹ ءِ تہ ءَ بوتگ۔
کتاب ءِ دیمدرائی ءَ براہھوئی ڈیپارٹمنٹ ءِ چئیرمین ڈاکٹر منظور بلوچ ءَ وتی ھیالاں درشان کنان ءَ گْوشت کہ براھوئی زُبان ءِ تہ ءَ ڈاکٹر تاج رئیسانی ءِ میان اُستمانی آزمانکانی رجانک علمی سرپدی ءِ تھر ءَ باز مزنیں کارے گْوشگ بیت اِنت۔ بلے ایشی ءِ ھواری ءَ بازیں جست ودی بیت اِنت کہ لبزانی رِد ءَ ڈاکٹر ءَ چُشیں کارے کُتگ۔ بلے جیڑہ ایش اِنت کہ آئی ءَ وتی اے علمی سرپدی ءِ کار ءِ تہ ءَ فکشن ءِ میدان ءَ رجانک گْچین کُتگ، گوشگ ءَ ما ایشرا ما یک آزمودھے گْوشت کن ایں، بلے آئی ءَ فکشن چُشیں تجربگے ءِ بھر ءَ زُرت کَنت-
آئی ءَ دیم ءَ گْوشت کہ ڈاکٹر رئیسانی فکشن ءِ مردُمے، آئی ءَ اے لبزانی واستا فکشن گْچین کُتگ، آئی ءِ زُبان اَبیدے لبزبلد ءَ وانگ نہ بیت ءُ فکشن یاں کہ لبزانک ءِ جیڑہ ایش اِنت کہ داں کہ وانوک آئی ءَ سرپد مہ بیت، آ ھما مزّہ ءَ گِپت نہ کنت اِنت۔
بلے ڈاکٹر ءِ کار ءِ علمی لوٹ ءَ چہ کسّے نا کُت نہ کنت، دومی نیمگ ءَ ڈاکٹر ءَ براھوئی زُبان ءِ تہ ءَ پَٹّ ءُ پول کنوکانی واستا یک مزنیں چیلنجے دیم ءَ آؤرتگ ، اے چیلنج، اے مزنیں جُست چہ آئی ءِ نیمگ ءَ شئوری ھم بوت کنت، ءُ لاشئوری ھم، آیوکیں وھد ءَ اے لبزانی سرا بوتگیں پٹّ ءُ پول، ایشی ءِ علمی اَرزشت ءُ علمی راستی ءَ نہ تھنا پدّر کن اَنت، بلکیں اے چیز ءِ کوشست ھم آھوکیں وھد ءِ علمی ءُ لبزانکانی کاراں گوں بندوک اِنت۔
ھمے وڑ ءَ اے دیمدرائی دیوان ءَ کتاب ءِ نبشتکار واجہ ڈاکٹر تاج رئیسانی ءُ کتاب ءِ شنگ کار قلات پبلشر ءِ واجہ نزر ھسین ءَ ھم وتی ھیال درشان کُتگ اَنت۔
اے دیوان ءِ تہ بلوچی تامُر “لولان” ءِ ٹیم ظھور فضل ءِ سر کماشی ءَ ھم ساڑی بوتگ ،ظھور فضل ءَ وتی ھیال درشان کنان ءَ گْوشت مرچی مارا سکّ وشّی بوت کہ مارا بلوچ راج ءِ دومی مستریں زُبان براھوئی ءِ اُستاد ءُ لبزانتانی گون ءَ نِندگ ءُ آھاں گوشدارگ ءِ موہ رَس اِت۔ ما اے گْوشگ لوٹ ایں کہ مئے واھگ اِنت کہ بلوچی ءِ تامُر براھوئی ءِ تہ ءَ رجانک ءُ ڈبنگ بہ بنت ھمے وڑا اگاں براہوئی تامُر ھست گُڑا ما آھاں بلوچی ءِ تہ ءَ بدل کنگ ءِ زمہ داری ءَ زورایں۔
دیوان ءَ نِشتگیں مردُماں ظھور فضل ءِ اے واھگ ءُ واھشت باز ساڑا اِت اَنت ءُ کمک کنگ ءِ ھم سدکی کنائینت۔