ٹی بی پی شونگال
پنجگور ءِ پجار بلوچستان ءِ جنگ ءَ چہ ترندی ءَ سانمند بیتگیں دمگے ءِ دروشم ءَ بیت اِنت، کہ اود ءَ ڈیتھ اسکواڈزاں لُٹ ءُ پُل، زورانسری بیگواھی ءُ کُشگ ءِ سرجمی ءَ آجوئی دیگ بیتگ انت۔ مزنیں کچے ءَ ورناہ سیاسی سُرءُ پُرانی پد ءَ زورانسری بیگواھی ءِ آماچ کنگ بیتگ اِت اَنت ءُ بازیں کُشگ بیتگ اَنت۔
پنجگور ءِ مھلوک ءَ ڈیتھ اسکواڈ ءِ زوراکیانی ھلاپ ءَ یکشلی ءَ گوں زھرشانی دگ گپتگ ءُ بلے اے ٹولیاں گمانی دروشم ءَ پوجی اسٹیبلشمنٹ ءِ پلامرزی گون اِنت۔ پنجگور ءَ چہ دہ سالاں راجی ءُ نودربر سیاست ءِ جار نہ جتگیں بندش اِنت۔ نیکراھی گلاں جِنکانی اسکول مانداشتگ اَنت ءُ نیکراھی گلاں سوتی مراگش ڈپٹی کمشنر ءِ کمک ءَ گوں بندش جنائنتگ اَنت۔ شھدربرجاہ ءِ نودربر گلاں کتاب میڑہ ءُ سیاسی ءُ ادبی سُر ءُ پُرانی برجاہ دارگ ءِ پرمان دیگ ءَ چہ انکاری اَنت چشکہ کجام ھم پئیمیں نودربر سیاست ءِ راہ دارگ بیتگ اَنت۔
صباء دشتیاری ءَ بلوچ ادب ءِ تہ ءَ گراں بھائیں ھزمت کُتگ اَنت، ءُ آئی ءِ بے کساسیں مھنت ءَ گوں اڈ کُتگیں سید ھاشمی ریفرنس لائبریری بلوچ ادب ءِ گراں مُل ایں ھزانگ اِنت۔ پنجگور ءِ اے جاورانی تہ ءَ صبا دشتیاری ادبی جَژن ءِ اڈ دیگ وشیں ھالے ءِ گام اِنت کہ اے سیاسی ءُ ادبی سُر ءُ پُرانی راہ ءِ پَچ کنگ ءِ سوب بیت کنت۔ چاگرد یکجاہ اوشتات نہ کنت ءُ چاگرد ءِ بُنرودی دیمروئی ءَ پہ سیاست، ادب ءُ اِزم ءِ سُرءُ پُر المی اَنت۔
بلوچستان ءَ سیاسی جُنزانی دارگ ءِ ھاتر ءَ نیکراھی ءِ ناشر گچینی ءِ توم کِشگ ءِ کوشست کنگ ءَ اَنت، ایشی ءِ دارگ ءِ ھاتر ءَ دیمروئی دوستیں ادارگانی زمہ واری گیشتر ود اَنت۔ بلوچ چاگرد ءِ تہ ءَ گیر سیاسی تاکتانی راہ دارگ ءِ ھاتر ءَ دیمروئی دوستیں ادارگ ءُ پاٹیانی سیاسی ءُ ادبی سُر ءُ پُرانی برجاہ دارگ المی اِنت ءُ پنجگور ءَ صباء دشتیاری لٹریری فیسٹول ءِ پئیمیں ادبی سُرپُر ءُ مراگش بلوچستان ءِ دگہ ھند ءُ دمگاں ھم برجاہ دارگ ءُ اڈ دیگ لوٹ اَنت۔