بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کرتگیں درشان ءِ تہ ءَ گوشتگ سرمچاراں آدینگ ءِ روچ ءَ کیچ ءِ ھند مند، سورو ءَ دُژمنیں لشکر ءِ کرنل ءِ گس ءِ سر ءَ اُرش کُرتگ۔
جارکش ءَ گوشتگ یک ستمبر ءَ آدینگ ءِ شپ ءِ نوہ ءِ نزیک ءَ مند ءِ سورو ءَ برجاھیں پاکستانی لشکر ءِ کرنل ءِ گِس ءِ سر ءَ دو راکٹ ءِ گولا آس داتگ کہ گِس ءِ تہ ءَ کپتگ اَنت، چہ ایشی ءَ پَد سرمچاراں گوں نوک ءُ ٹوھیں سلاھاں لشکر ءِ بُنجل ھم نشانگ کُرتگ۔ اے اُرش ءَ پاکستانی لشکر ءَ جانی ءُ مالی تاوان بیتگ۔
آئی ءَ گوشتگ سرمچاراں نزیک ءَ شُتگ ءُ اُرش کُرتگ کہ ھندی آبادی چہ تاوان ءَ رکینگ بہ بیت،بلے سرمچارانی اُرش ءَ پد پروش وارتگیں دُژمن ءَ پہ دیم تیرگْواری کُرتگ ءُ آبادی ءِ سر ءَ ماٹر آس داتگ کہ پاکستانی لشکر ءِ آس داتگیں ماٹر ءِ یک گولایے ھندی آبادی ءَ یک گسے ءِ سر ءَ کپتگ کہ دو جنیناں ھوار سَے مردم ٹپی بیتگ۔
میجر گوھرام بلوچ ءَ گوشتگ پاکستانی لشکر ءَ بلوچ سرمچارانی اُرشانی دارگ ءِ زِکت ھست نہ کہ دیم پہ دیم بیگ ءِ توانے ھست۔ برابر ءِ توان ءِ دیم ءَ پروش ورگ ءِ سْوب ءَ دُژمن دست ءُ گوشیں مردماں اُرش ءِ نشانگ کنت ءُ مُچی سزا ءِ شوندات ءِ رد ءَ مردماں تُرسین ایت داں کہ پہ زور مردماں چہ آجوئی زْرمبشت ءِ پلہ مرزی کنگ ءَ دزکش بہ کنت۔
آئی ءَ گوشتگ بلوچ راج ءِ بےتاھیر کنوک شات مہ بنت کہ آ زورگیپتیں بلوچستان ءَ پہ ایمنی وپس اَنت۔
میجر گوھرام بلوچ ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ داں بلوچستان ءِ آجوئی ءَ زورگریں پاکستانی لشکر ءُ ریاست ءِ دُرسیں سیتانی سر ءَ مئے اُرش برجاہ بنت۔