پاکستانی پوج ءَ نوشکی ءَ بازیں لوگانی سر ءَ بیڑ برتگ ءُ پنچ مردم آوار جنگ ءَ پد بیگواہ کتگ اَنت ءُ پوج ءَ زھگ ءُ زالبول ھم لٹ ءُ کُٹ کتگ اَنت-
بلوچستان ءِ دمگ نوشکی ءِ جتا جتائیں جاھاں پاکستانی پوج ءَ شپ ءَ بیڑ برتگ ءُ پنچ مردم آوار جنگ ءَ پد زورانسری بیگواھی ءِ آماچ کتگ اَنت-
بیگواہ کنگ بیتگیں مردمانی پجار ھکنواز جھمنند مینگل میتگ، ،ھامد جھمنند مینگل میتگ، جاپر جھمنند جمالدینی میتگ، آمر جھمنند شریپ ھان میتگ ءُ کسان سالیں یاسین جھمنند شریپ ھان میتگ ءِ ناماں زانگ بیتگ اَنت-
دمگی مردمانی رد ءَ اے مردم اگست ءَ جتا جتائیں روچاں لوگانی سر ءَ بیڑ ءِ وھد ءَ پاکستانی پوج ءُ چیریں ادارھاں آوار جتگ ءُ برتگ اَنت-
دمگی مردمانی رد ءَ بیڑ ءِ وھد ءَ پوج ءَ جاڑیگیں مردم لٹ ءُ کُٹانی نشانگ کتگ انت ءُ ھمے وڑ زالبول ھم لٹ ءُ کٹانی نشانگ کنگ بیتگ اَنت-
زانگ بہ بیت چد ءُ پیسر چہ نوشکی ءَ جمالدینی ءِ میتگ ءَ دگہ یک ورنایے آتپ ء ماسٹر آدل ھان ھم پاکستانی پوج ءِ دست ءَ زورانسری آوار جنی ءِ ھال اتکگ بیتگ ات-
دمگی واکداراں تنی وھدی اے درگت ءَ دگہ اھوال دیم ءَ نیاؤرتگ اَنت-
سرجمیں بلوچستان ءَ زورانسری آوارجنی گوستگیں بازیں سالاں چہ برجاہ اَنت ءُ گوستگیں دو ماھانی توک ءَ یک رندے پد ءَ اے وئیلانی توک ءَ ترندی گندگ آیگ ءَ اِنت-
زورانسری آوار جنیانی گیشی ءِ ھلاپ ءَ بلوچ یکجھتی کمیٹی کراچی ءِ نیمگ ءَ کراچی پریس کلب ءِ دیم ءَ دو روچی بنجلے برجم کنگ بیتگ ات ءُ پد ءَ زھرشانی روانکے کشگ بیتگ ات ءُ ھمے وڑ شال ءَ ھم بلوچ بیگواھیں مردمانی ھاتر ءَ توار چست کنوکیں گل وائس فار بلوچ مسنگ پرسنز ءِ نیمگ ءَ پریس کلب ءِ دیم ءَ زھرشانی برجاہ اِنت-
وائس فار بلوچ مسنگ پرسنز ءِ رد ءَ بلوچستان ءَ زورانسری آوار جنیانی درچانی توک ءَ ترندی گندگ ءَ اتکگ گڑا ھمے داب ءَ وی بی ایم پی ءِ زالبول رھشوناں ترسینگ ءِ آماچ کنگ ءَ اَنت-