بلوچستان: زورانسری آوار جنیانی بگیری ءَ زھرشانی برجاہ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ یکسد ءُ سِی ءُ شش روچ سرجم بوتگ انت – مروچی بی ایس او ءِ بنجاھی جنرل سیکریٹری ماما عظیم بلوچ، سیکریٹری اطلاعات بالاچ قادر، صمند بلوچ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ بلوچ چاگرد ءَ گلامی ءِ ریشگ مھکمی ءَ نہ اشتگ انت ھمے ھاتر ءَ ریاست ءَ پرایمنیں جھد ءِ کندم کنگ ءَ وتی زور جتگ ءُ زوراکی ءِ سرجمیں سیمسر گوازینتگ انت –

ماما قدیر بلوچ ءَ گوشتگ کہ ریاست وتی زوراکیانی برجاہ دارگ ءَ وتی ناشرکاری شوربندیانی رِد ءَ روان انت، آئی ءِ اے کار پدر انت کہ پوج ھمک روچ بلوچ سیاسی باسک، نودربر، ورنا، ڈاکٹر، وکیل، انسانی ھکانی باسکاں ھوار ھر تک ءُ پھناتاں سیادی داروکیں مردماں آوار جنگ ءُ بیگواہ کنگ ءَ انت ءُ آیاں وتی زندانانی تہ ءَ ازیت دنت ءُ نمیران کنت، وھدیکی اے بلوچ پرزندانی ژانگولیں جون ھم ویرانگاں چگل دیگ بوگ ءَ انت –

آئی ءَ گوشتگ کہ تنی وھدی ھزارانی کچ ءَ زورانسری آوار جنگ بوتگیں مردمانی جون دست کپتگ انت وھدیکہ ھزارانی کچ ءَ آوار جتگ ءُ بیگواہ کتگ انت، سدانی کچ ءَ زالبول ءُ زھگ ءُ کماش ھم ھوار انت کہ پوج ءِ زوراکیانی نشانگ بوتگ انت ھمے وڈ ھمے سالانی تہ ءَ ریاست ءَ وتی زوراکیاں ھزاراں بلوچ نمیران کتگ انت –

ماما قدیر بلوچ ءَ گوشتگ کہ ریاست ءِ اے زورانسری آوار جنی ءُ نمیرانی ءِ درچ تاں ھما وھد ءَ برجاہ مان انت تانکہ زور بیگواھیں مردم یل کنگ مہ بنت، بلوچ وتی منزل ءَ سر مہ بنت یاکہ گلامی ءَ مہ من انت بلے پدا ھم بلوچ راج ءِ پرایمنیں جھد ءِ گیشی ءُ دیمھونیاں چہ ھمے گندگ بیت کہ بلوچ راج نوآبادیانی ریاستی اے کوش جاہ ءَ گوزیت ءُ وتی منزل ءَ سربیت –