تربت: زورانسری آوار جنگ بوتگیں نوشاد بلوچ ءِ یل نہ کنگ ءِ بگیری ءَ زھرشانی

نوشاد بلوچ ءِ یل نہ کنگ ءِ بگیری ءَ آئی ءِ کھول ءِ مردماں تربت ءَ زھرشانی ءُ روانک کش اِتگ –

نوشاد ء میانداد کہ آ گوستگیں ماہ ءَ جولائی ءَ پاکستانی پوج ءَ چہ تربت آپسر پانگس ءَ زورانسری آوار جتگ ءُ گوں وت برتگ کہ ھما انت گار ءُ بیگواہ انت –

نوشاد بلوچ ءِ کھول ءُ بلوچ یکجھتی کمیٹی ءِ نیمگ ءَ مروچی پنچ شمبے ءِ روچ ءَ مزنیں کچے ءَ مردماں روانک کش اِتگ ءُ زھرشانی کتگ، درنگاز کنوکاں تربت ءِ کمشنر ءِ گِس ءِ دپ ءَ نندانک جتگ ءُ وتی زھرشانی نبشتہ کنائیں اِتگ –

اے درگت ءَ تربت پریس کلب ءَ آئی ءِ کھول ءَ گوں اھوالکاراں تران کنان ءَ گوشتگ کہ نوشاد گِس ءِ کارے ءَ تربت ءَ شُتگ بوتگ ءُ واتر آیگ ءَ بوتگ کہ آپسر پانگس ءِ نزیک ءَ زورانسری آوار جنگ ءُ بیگواہ کنگ بوتگ –

آیانی گوشگ ات کہ بلوچستان ءَ ھمک روچ زورانسری آوارجنیانی تہ ءَ گیشی آیگ ءَ انت – بلوچ مات وتی زھگاں ورنا کن انت گڈا آ آوار جنگ بنت – اگاں مئے زھگ کتکار انت گڈا آیانی کتکاری زاھر کنگ بہ بیت اے وڈ آیاں آوار جنگ ءُ بیگواہ کنگ ءَ ھچ کانود موکل نہ دنت –

نوشاد بلوچ ءِ کھول ءَ کیچ ءِ واکدار، بلوچستان ءِ سرکار ءَ ھوار انسانی ھکانی ادارھاں گوں لوٹ کتگ ءُ گوشتگ کہ نوشاد بلوچ ءِ وش ءُ سلامتی یل کنائیگ ءَ وتی کرد ءَ پیلو بہ کن انت –

کھول ءَ گوشتگ کہ گس ءِ ورنایے بیگواھی دردناک انت ءُ مئے زھگ اے وڈیں ھچ کارانی بھر نہ بوتگ انت کہ چریشی ءَ ریاست ءَ تاوان بہ رسیت ھمے ھاتر ءَ نوشاد زاھر کنگ بہ بیت ءُ یل کنگ بہ بیت –