دزگیر کنگ بوتگیں سعید ءُ محمد نادر ءِ کوش ءُ بولان پوجی پانگس ءِ پروشگے زمہ واری بی ایل اے ءَ منّ اِتگ انت

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل “ھکل” ءَ شنگ کرتگیں درشان ءِ تہ ءَ بولان ءَ نوک جوڈ بؤکیں پوجی پانگس ءُ دزگیر کنگ بوتگیں پنجاپ ءِ جھمنند سعید ءُ محمد نادر ءِ کوش ءِ زمہ واری منّ اِتگ انت – جارکش ءِ رِد ءَ ھردو دزگیر کنگ بوتگیں پنجاپ ءِ جھمنند ریاستی چاریگ بوتگ انت –

بی ایل اے ءِ جارکش جیئند بلوچ ءَ وتی درشان ءِ تہ ءَ گوشتگ کہ سرمچاراں بیست ءُ شش جون دوھزار ءُ بیست ءُ سَے ءَ ھرنائی ءَ مانگی دگ بستگ ءُ ھمے میان ءَ پاکستان ءِصوبہ پنجاپ ءِ دمگ رحیم یار خان ءِ جھمنند سعید ءُ چار جولائی دوھزار ءُ بیست ءُ سَے ءَ چہ شال ءِ دمگ زرغون ءَ پنجاپ ءِ دمگ ملتان ءِ جھمنند محمد نادر ء عبدالمجید دزگیر کتگ انت –

جارکش ءِ رِد ءَ جست پُرس ءِ میان ءَ ھردو دزگیریں مردماں دپ ءِ وت منّ اِتگ کہ آ پاکستانی پوج ءِ گوشگے پد ءَ کار کنگ ءَ انت – سعید ءَ دپ ءِ وت منّ اِتگ کہ آئی ءَ بازیں سالے بیت کہ شال ءِ تہ ءَ کاپینٹر ءِ پوشاک ءَ پہ پوج ءِ ھاتر ءَ کار کُتگ وھدیکہ آئی گوں ھرنائی ءِ دمگی چاریگانی گوما ھم ھال اھوال بوتگ –

دومی چاریگ محمد نادر ءَ ھم دپ ءِ وت منّ اِتگ کہ آ پاکستانی پوج ءِ چیریں ادارھانی ھاتر ءَ کار کنگ ءَ بوتگ وھدیکہ آ ھمے درگت ءَ زرغون ءَ یک مردمے ءِ گند ءُ نند ءَ اتکگ بوتگ کہ دزگیر کنگ بوتگ –

میارباری ءِ منگ ءَ پد بلوچ راجی آمیدگس ءَ ھردو مردم مرگ ءِ سزا داتگ انت ءُ گوستگیں روچ ءَ بی ایل اے ءِ سرمچاراں آ کُشتگ انت –

جارکش ءَ وتی درشان ءِ تہ ءَ دیمتر ءَ گوشتگ کہ مروچی بولان ءِ دمگ پیر اسماعیل ءَ منصور ٹاپ ءِ ھند ءَ بی ایل اے ءِ سرمچاراں زورگیریں پاکستانی پوج ءِ نوک جوڈ بؤکیں پانگسے پروشتگ ءُ تباہ کتگ –

جارکش ءَ گوشتگ کہ بی ایل اے ھرسَئیں ارشانی زمہ واری ءَ منیت ءُ کول کنت کہ زورگیریں پوج ءُ آئی ءِ کمک کارانی سر ءَ مئے اُرش ترندی ءَ گوں برجاہ بنت –