آواران ءَ یک مردمے بیگواہ، سَے کس یل بیتگ اَنت

بلوچستان ءِ دمگ آواران ءَ یک مردمے زورانسری آوار جنگ ءَ پد بیگواہ کنگ بیتگ، ھمے وڑ سَے مردم پاکستانی پوج ءِ بندیگ جاہ ءَ یل بیتگ ءُ وتی لوگاں سر بیتگ اَنت-

بیگواہ بیتگیں مردم ءِ پجار مھمد عظیم ء مھمد فضل ءِ نام ءَ زانگ بیتگ کہ آواران ءِ دمگ زیارت ڈن ءِ جھمنند اِنت-

دمگی مردمانی گوشگ اِنت کہ اے مرد ناشناسیں مردماں آوار جنگ ءَ پد بیگواہ کرتگ – آوار جنوکانی بارو ءَ گوشگ بوگ ءَ اِنت کہ ایشانی سیادی سرکاری پلامرزی ءَ ھستیں سلاہ بندیں ٹولی ءَ اِنت-

زانگ بہ بیت سرجمیں بلوچستان ءَ پاکستانی پوج ءَ بازیں سلاہ بندیں گل جوڑ کرتگ اَنت آ لس ناماں ڈیتھ اسکواڈ ءِ نام ءَ زانگ بنت اِنت – راجدوستانی گوشگ اِنت اے ٹولی بلوچانی آوار جنگ ءُ دگہ چاگردی سلکاریاں ھوار اَنت-

دومی نیمگ ءَ چہ آواران ءَ ھال اِنت کہ سَے مردم پاکستانی پوج ءِ بندیگ جاہ ءَ یل بیتگ ءُ وتی لوگاں سر بیتگ اَنت-

یل بیتگینانی تہ ءَ واحد ء کریم بخش، امداد ء ابراھیم ءُ الیاس ء ابراھیم ھوار اَنت-

یل بیتگینانی تہ ءَ واحد ءُ امداد دلبود نامیں مردمے ءِ ھواری ءَ پوج ءَ ھبدہ جولائی دوھزار ءُ بیست ءُ سَے ءَ دزگیر کتگ ءُ برتگ انت ءُ واحد ءُ امداد مروچی یل بیتگ اَنت ءُ دلبود داں انگت ءَ بیگواہ اِنت-

ھمے وڑ ءَ الیاس گوستگیں سال ءِ ستمبر ءِ ماہ ءَ مشکے ءِ ھند گجر ءَ پوج ءَ آوار جتگ ءُ بیگواہ کتگ-