زورانسری آوار جنگ بوتگیں کسان سالیں زھگ کفایت اللہ ءَ پنچ، ءُ محمد رمضان ءَ سیزدہ سال سرجم بوتگ انت

پاکستانی پوج ءُ چیریں ادارھانی دست ءَ چہ ھاران ءَ زورانسری آوار جنگ بوتگیں دھ سالی زھگ کفایت اللہ ءِ بیگواھی ءَ پنچ سال ءُ چہ اوتھل ءَ آوار جنگ بوتگیں بی این ایم ءِ رھشون محمد رمضان ءَ بیگواھی ءَ سینزدہ سال سرجم بوتگ انت کہ ھنگت گار ءُ بیگواہ انت –

سال دوھزار دھ ءِ بیست ءُ پنچ جولائی ءَ چہ اوتل ءِ سَے راھی ءَ پاکستانی پوج ءِ دست ءَ زورانسری آوار جنگ بوتگیں مھمد رمضان ءِ زھگ علی حیدر ءَ وتی پِت ءِ زورانسری آوار جنی ءِ سیزدہ سال سرجم بوگ ءَ ماں چاگردی ترامجاہ ٹویٹر ءَ نبشتگ کہ منی پِت محمد رمضان ءِ زورانسری آوار جنی ءَ مروچی سیزدہ سال سرجم بوتگ انت –

آئی ءَ نبشتگ کہ پہ پِت ءِ یل کنائینگے ھاتر ءَ مئے کھول ءَ گوستگیں سیزدہ سال اِنت کہ یکشل ءَ جھد کنگ ءَ اِنت – ءُ وی بی ایم پی ءِ ھمراھی ءَ چہ شال ءَ بگر داں اسلام آباد ءَ روانک کش اِتگ ءُ شال ءِ دراجکشیں زھرشانی نندانک ءَ ھم ھوار بوتگ ایں –

علی حیدر ءَ دیمتر ءَ نبشتگ کہ آئی ءَ زھرشانی ءِ درسیں راہ کارمرز کرتگ اَنت، بلے سیزدہ سال ءِ گوزگ ءَ پد ھم انگت ءَ پِت دیم ءَ آرگ نہ بوتگ-

آئی ءَ گوشتگ کہ اے سیزدھیں سال منی کھول ءَ گوں کجام درداں گوں گوازینتگ اَنت کس گمان کرت نہ کنت – آئی ءَ ھر تک ءُ پھناتاں سیادی داروکیں مردمانی گوم ءَ لوٹ کتگ کہ پت ءِ زورانسری آوار جنی ءِ بگیری ءَ توار چست بہ کن انت-

چہ ھاران ءَ سیادی داروکیں دھ سالی زھگ کفایت اللہ بیست ءُ پنچ جولائی سال دوھزار ءُ ھژدہ ءَ زورانسری آوار جنگ بوتگ –

بیگواھیں کفایت اللہ ءِ کھول ءِ نیمگ ءَ آئی ءِ زورانسری آوار جنی ءِ بگیری ءَ وھد وھدے سر ءَ زھرشانی ءُ روانک کشگ بوتگ ءُ سال دوھزار بیست ءُ یک ءِ دسمبر ءِ ماہ ءَ ھاران ءَ پریس کلب ءِ دیم ءَ ادارکی شدکشیں زھرشانی بنجلے ھم جنگ بوتگ ءُ آئی ءِ یل کنگ ءِ لوٹ کنگ بوتگ –

زانگ بہ بیت کفایت اللہ بلوچ سال دوھزار ھژدھے گیچین کاریانی روچ ءَ چہ ہولنگی راسکوہ پولنگ اسٹیشن ءَ ناشناسیں مردماں آوار جتگ-

دومی نیمگ ءَ بیگواھیں مردمانی پانکجنیں گل وائس فار بلوچ مسنگ پرسنز ءَ محمد رمزان ءِ زورانسری آوار جنی ءَ سینزدہ سال سرجم بوگ ءَ ماں چاگردی ترامجاہ ٹویٹر ءَ بیست ءُ شش جولائی ءَ کمپئینے برجم دارگے جار جتگ –

وی بی ایم پی ءَ وتی جار ءِ تہ ءَ گوشتگ کہ محمد رمضان ءِ زورانسری آوار جنی ءَ مرچی سیزدہ سال سرجم بوتگ انت – علی حیدر ءُ آئی گھاراں پہ وتی پِت ءِ آجوئی ءَ ایمنی جھد کنان ءَ ورنا بوتگ اَنت، بلے آھاں تنی وھدی انساپ نہ رستگ –

آئی ءَ گوشتگ کہ وائس فار بلوچ مسنگ پرسنز زورانسری آوار جنگ بوتگیں محمد رمضان ءِ زھگانی گون ءَ پہ ھمدردی کنگ ءَ بیست ءُ شش جولائی ءَ شپ ءِ ادار ھشت ءَ بگر داں دوازدہ ءَ ٹویٹر ءَ #ReleaseRamzanBaloch کمپینے برجم دار ایت –

وی بی ایم پی ءَ سیاسی پارٹی، نودربر گلاں ھوار ھر تک ءُ پھناتاں سیادی داروکیں مردماں گوں لوٹ کرتگ کہ آ اے کمپین ءَ شریں وڑے ءَ بھر بزور اَنت ءُ محمد رمضان ءِ زھگانی توار جوڑ بہ بنت-