بلوچستان: ھزدار ءُ گومازی ءَ سَے ورنا بیگواہ

سربوتگیں ھالانی رِد ءَ بلوچستان ءِ دمگ ھزدار ءِ جھمنند محمد رضوان چہ شال ءَ بیگواہ، تمپ گومازی ءَ پاکستانی پوج ءَ بیڑ برتگ ءُ زوراکی کنان ءَ دو ورنا زورانسری آوار جتگ انت –

ھزدار ءِ جھمنند محمد شعیب ءَ گوں اھوالکاراں تران کنان ءَ گوشتگ کہ محمد رضوان ء محمد رمضان نتھوانی جھمنند بالینہ کھٹان ھزدار چار جولائی دوھزار ءُ بیست ءُ سَے ءِ ادار چار ءَ چہ شال سریاب دگ ءَ گاڑی ءَ ایرگیجگ ءُ آوار جنگ بوتگ –

محمد شعیب ءِ رِد ءَ آئی ءِ گڈی لوکیشن ھم سریاب دگ دگری کالج ءِ نزیک ءَ گوشگ بوگ ءَ کہ آئی ءَ چہ بند گوانکو ءِ بند انت، شال ءِ درسیں پولیس کارگس ما سرپد کتگ انت بلے ھنگت ھچ وڈیں سرپدی نہ رستگ –

آھاں لوٹ کتگ ءُ گوشتگ کہ محمد رضوان ءِ درگت ءَ ھرکس ءَ سرپدی ءِ بیت اگاں کسی ءَ دیستگ گڈا مارا سرپدی دیگ بہ بیت –

دومی نیمگ ءَ تمپ ءِ دمگ گومازی ءَ پاکستانی پوج ءُ چیریں ادارھانی کارمنداں گوستگیں شپ ءَ عبدالصمد نامی مردمے ءِ گِس ءَ بیڑ برتگ ءُ زوراکی کنان ءَ عبدالصمد ءِ دو زھگ زورانسری آوار جتگ ءُ گوں وت برتگ انت –

آوار جنگ بوتگیں ورنایانی پجار سگیر ء عبدالصمد ءُ داد رحیم ء عبدالصمد ناماں بوتگ اِنت –

آوار جنگ بوتگیں ورنایانی درگت ءَ گوشگ بوگ انت کہ سگیر چدوپیسر ھم سَے چار رند ءَ زورانسری آوار جنگ ءُ پدا رند ءَ یل کنگ بوتگ –

زانگ بہ بیت بلوچستان ءِ جتا جتائیں ھند ءُ دمگاں پاکستانی پوج ءِ زورانسری آوار جنیانی درچ یکشل ءَ برجاہ انت – گوستگیں بیست ءُ چار ادارانی میان ءَ یازدہ مردم آوار جنگ بوتگ –

دی بلوچستان پوسٹ ءِ جولائی ماھے دو ھپتگانی شنگ بوتگیں رپورٹ ءِ تہ ءَ گوشگ بوتگ کہ بلوچستان ءَ سینزدہ مردم زورانسری آوار جنگ ءُ بیگواہ کنگ بوتگ انت –