دی بلوچستان پوسٹ
پہ دَپ ءِ زور ءَ زَانتکاراں ، نو پہ ما ھُدا ءِ جِند اِنت
اِچ نہ زانہ ءَ ھبر بازاں ، نو پہ ما ھُدا ءِ جِند اِنت
نہ مَکتب ءِ پُشت ءِ دیستگ ، نہ زانش ءِ چاگرد ءَ
ھُشکیں مَنطق ءُ دلیلاں ، نو پہ ما ھُدا ءِ جِند اِنت
کار ءُ کِردار ءَ چہ زِبر اَنت ، بس دَپ ءَ سُکرات آں
بَس دَپءِ بَٹاکءَ نِشتگاں ، نو پہ ما ھُدا ءِ جِند اِنت
ھُشکُتیں ءُ گُشتگیں ھَبرانی با پُشت ءَ دوکان اِنت
ہمے مئے رھشون راھبراں ، نو پہ ما ھُداءِ جِند اِنت
ادا زَانت ءُ زانش ءِ بیپار اِنت ، مئے ھَلک ءُ میتگءَ
ھَلک ءُ میتگ سُتکگاں ، نو پہ ما ھُدا ءِ جِند اِنت
پرِیات ءُ زَار رہسراں بیپاری اِنت ، شَال ءِ دَمک بُنءَ
سُتکگ اَنت گِدان رھبراں ، نو پہ ما ھُدا ءِ جِند اِنت
دَپ ءِ توسیپ آں چہ دَر بِکپ ، جہُد ءِ پِڑ ءَ بَرانز
پہ جہُد ءِ کَمان ءُ رھبراں ، نو پہ ما ھُدا ءِ جِند اِنت