بلوچستان ءَ وتکُشی ءِ روِشت
نبشتہ کار: زھیر بلوچ
دی بلوچستان پوسٹ
انچو کہ ما شُما سرپدیں بلوچ گُلزمین زوراکانی زیردست انت۔ اے زورگری ءَ بلوچ ءِ چاگرد، زندمان کار ءُ کَسب ءُ بلوچ راج ءِ مجگ ءِ سر ءَ باز سان دور داتگ۔ گوستگیں ھپتاد ءُ پنچ سال انت کہ زورگریں اِستان ءَ بلوچ ڈیھ وتی چنگلانی چیرا کُتگ ءُ بلوچ ءِ چُکچینی ءَ کنگ ءَ اِنت۔ اے چُکچینی روشت ءِ تہ ءَ زورگِریں لشکر وتی سرجمیں زور ءَ کارمرز کنگ ءَ انت۔
اے رِد ءَ زورگریں لشکر بمب ءُ ٹوپاں ھوار زورآنسری آوارجنی، کُشگ ءُ دور دیگ، تُرس ءُ پاتراپ، لب ءُ لالچ، نشہ ءُ سلکاری، نوک آبادکاریں وانگی روشت ءُ مجگی ازیتانی سلاھاں کارمرز کنگ ءَ انت۔ زورگِر ءِ اے دُرسیں کارپدانی آسر ءَ بلوچ چاگرد ءُ بلوچ ءِ زندمان سرجم ءَ تباہ کُتگ۔
مرچی باندا ما شُما گندگ ءَ ایں کہ بلوچستان ءَ وت کُشی ءِ روشت ءُ وئیلانی تہ ءَ ھمُک روچ گیشی پیداک انت۔ اے رِد ءَ گیشتر وانِندگ ءُ ورناہ مارا گندگ ءَ کاینت کہ وت کُشی کنگ ءَ انت۔ چُشیں روچ ءِ نہ گوز ایت کہ بلوچستان ءِ کجام دمگے ءَ یک ناں یک مردمے وتکُشی نہ کنگ ءَ اِنت۔ نوں جُست ایش انت کہ بلوچستان ءِ تہ ءَ ورناہ ءُ نودربر چی ءَ وتکُشی کنگ ءَ انت؟ ایشی ءِ مستریں سبب زیردستی ءُ نوک آبادکاریں روشت انت کہ بلوچ راج ءَ را مجگی گُلام ءِ جوڑ کتگ۔ پد ءَ بلوچستان ءَ کار ءُ روزگاری جیڑا ءَ ھوار وانگی جیڑا ءُ نشہ ءِ جیڑا ھم روچ پہ روچ چہ زورگِر ءِ نیمگ ءَ گیش ودان اِنت۔ دنیا ءِ تہ ءَ ازگارتریں سرزمین ءِ واھُند مرچی پہ چُنڈے نان ءَ وازمندگ اِنت۔دومی نیمگ ءَ زورگریں لشکر ءَ یک انچیں تُرسے بلوچستان ءِ تہ ءَ ودی کتگ کہ بلوچ راج وتی گِس ءِ تہ ءَ ھم ایمن نہ انت۔ لج ءُ ناموس ءِ پامالی بلوچ زالبولانی زورآنسری آوارجنی ءُ کمشرپی ھمُک روچ گیش بوان انت۔ھمے سبب انت کہ نون بلوچستان ءَ مردین ءَ ھوار زالبول ھم وتکُشی کنگ ءَ انت-
اے رِد ءَ بازیں درور مئے دیم ءَ ھست انت کہ بلوچ زالبول زورگریں لشکر ءُ آئی ءِ داشتگیں کاسگ چٹانی زوراکی ءِ آماچ بوگ ءَ انت۔ اے رِد ءَ ھمے زوتاں چہ آواران ءَ نجمہ بلوچ ءِ درور مئے شمئے دیم ءَ انت کہ پہ وتی بلوچی گیرت ءِ رکینگ ءِ ھاتر ءَ وتکُشی کُت یے۔ چُشیں درور بلوچستان ءَ سک باز ھست کہ ھمُک روچ چُشیں وئیل بوگ ءَ انت۔ باز مردم وَ تُرس ءُ بیم ءِ آماچ بنت ءُ وتی بلوچی اِزت ءِ ھاتر ءَ بیتوار بنت ھستیں وھد ءَ بلوچستان ءِ سرجمیں وانگجاہ زورگریں لشکر ءَ وتی بُنجل ءُ پانگس جوڑ کتگ انت۔ بلوچستان ءِ مزن شاھدربر جاہ ءَ بگِر دانکہ وانگ جاھاں درا پھگ لشکری بُنجل جوڑ بوتگ انت۔ ھمے سبب ءَ بلوچ نودربر تُرس ءِ آماچ انت آ تُپنگ ءِ ساھگ ءَ ونت نہ کنگ ءَ انت۔
دومی نیمگ ءَ بلوچستان ءِ وانگ جاہ ءُ شاھدربر جاھاں زورگریں ریاست ءِ وانگی نِزام ءَ بلوچ نودربر مجگی نادُراہ کتگ انت۔ چی ءَ ھودا نودربر تُرس ءُ بیم ءُ آماچ کنگ بنت نودربرانی توار ایرموش کنگ بیت۔ آھانی بُنکی لوٹ لگتمال کنگ بنت اگاں توار چست بکن انت گُڑا دزگیر کنگ ءُ وانگ جاہ ءَ در کنگ بنت۔ ھمے وڑا یک دگہ مزنیں جیڑایے ما گندگ ءَ ایں کہ بلوچ نودربرانی فکر ءُ سوچ مرچاں بس ڈگری گِرگ ءُ گیش چے گیش لمبر گِرگ ءِ ریس ءَ لگ اتگ انت۔ اگاں کسے ءَ ڈگری نہ رس ایت یا لمبر ءِ کم بنت گُڑا مجگی نادُراہ بیت ءُ وتا ملامت کنت۔ چیاکہ مرچی کس پہ زانت ءُ زانگ ءِ ھاتر ءَ وانگ ءَ نہ انت بلکیں بس ڈگری ءُ نوکری گِرگ ءُ زَر ءِ کماھگ ءِ پُشت ءَ کپتگ۔
بلوچستان ءِ تہ ءَ وتکُشی ءِ گیش بوگ ءِ روشت باز بژنیگیں گپے۔ اے درگت ءَ مئے لبزانکی ءُ زانتکاریں مردماں ، سیاسی ءُ چاگردی جھدکاریں سنگتاں گامگیج زورگ لوٹ ایت وتی راج ءِ ورناہ سوج ءُ سر کنگ لوٹ انت دانکہ آ وتکُشی ءَ چے وتا دور بدار انت۔دومی من بلوچ مات ءُ پِتاں گوں ھم دزبندی کن آں کہ وتی چُکاں وھد بدی اِت آھانی گپ ءَ گوشبدار اِت ءُ آھانی دلبڈی ءَ بکن اِت۔ چیاکہ باز مردم وتی لوگ ءِ تہ ءَ ھم زھنی ازیت ءِ آماچ بنت۔ لوگ ءِ تہ ءَ زھنی تاھیر نہ گند انت۔ مارا شمارا وتی لوگ وتی چاگرد ءُ وتی گلزمین پلگارگی انت۔ وتی راج ءِ رُژنائیں باندات بلوچ ورنا ءُ نودربراں پلگارگی انت۔ اے سرجمیں بلوچ راج ءِ جیڑا اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔