شال: زورانسری آوار جنیانی بگیری ءَ زھرشانی برجاہ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی درچ یکشل ءَ برجاہ، ماما قدیر بلوچ ءِ سروکی ءَ برجاھیں اے زھرشانی ءَ مروچی ءَ پنجاہ ءُ یک ھزار ءُ یک روچ سرجم بوتگ انت –

مروچی نیشنل پاٹی ءِ رھشون میر غفار قمبرانی، غلام فاروق ءُ عبدالمنان ءَ ھوار دگہ مردماں بنجل ءَ اتکگ ءُ بیگواھیں مردمانی گوم ءَ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ زرمبشت ھما وھد ءَ بندات بنت وھدیکہ زلم ءُ زوراکیانی سیاہ ءُ تھاریں جمبر رؤگ ءِ نام ءَ مہ زان انت، بید جھد ءَ جھان ءِ ھچ زرمبشت سوبمند نہ بوتگ انت جھد سوبمندی ءِ زامن انت –

آئی ءَ گوشتگ کہ جھد ھما وھد ءَ سوبمند بنت وھدیکہ آھانی دیم ءَ بہ روک ءَ لیڈر شپ ءِ سنچ بہ بنت – جھان ءِ تہ ءَ ھر کج ءَ زرمبشت بوتگ انت اودا لکھانی ھساب ءَ ایردستیں مردماں وتی ھون ریتکگ انت –

آئی ءَ گوشتگ کہ پاکستان ءِ تہ ءَ پوج چیریں ادارھانی ھاکمی انت – بلوچانی دیمھونی ءَ میان استمانی تاکت امریکہ ءُ آئی ھم سنتانی چم پچ کُتگ انت –

ماما قدیر ءَ گوشتگ کہ زورانسری آوار جنگ بوتگیں مردمانی کھولانی کربانیاں بلوچ راج ءِ ھوسلہ ءَ برز کتگ نمیرانیں بلوچ تھنا وتی کھول ءِ ناً بلکنہ پہ وتی پگر ءِ وارس بلوچ راج انت – زورانسری آوار جنگ بوتگیں مردمانی کھول بلوچ سرڈگار ھر ھما کُنڈ ءَ بہ رو انت بلوچ راج گوں آھاں پہ مھری دچار کپ انت –