ھزدار ءُ پسنی ءِ جھمنندیں سَے کس ماں کراچی ءَ بیگواہ

پاکستانی پوج ءَ چہ کراچی ءَ ھزدار ءِ جھمنندیں دو ناکوزتک ءُ پسنی ءِ جھمنندیں ورنا دزگیر کنگ ءَ پد بیگواہ کنگ بیتگ –

بیگواہ بیتگیں ورنایانی پجار مھمد ء مھمود جعفر آباد ھزدار، عاصم ء مھمد اعظم ءُ معراج اسلم ء مھمد اسلم جھمنند پسنی ببر شور ءِ ناماں زانگ بیتگ اَنت –

ھزدار ءِ جھمنندیں بیگواھیں مردمانی کھولانی رد ءَ ھردوکیں ورناہ شانزدہ جون دوھزار ءُ بیست ءُ سَے ءَ پوج ءَ دزگیر کنگ ءَ پد بیگواہ کتگ اَنت-

کھول ءَ انسانی ھکانی ادارھاں گون ھردوکیں ورنایانی یل کنگ ءَ وتی کرد ءَ پیلو کنگ ءِ دزبندی کتگ ءُ گوشتگ کہ آیانی سلامتی ءِ ھاتر ءَ آیانی توار جوڑ بہ بنت – ایشی ءَ پیش دیر بہ بیت کہ آیاں ناگتی سی ٹی ڈی دروگیں جنگ ءِ نام ءَ مہ جنت –

آیاں گوشتگ ما سندھ ءِ سرکار ءَ دزبندی کن این کہ آیاں پولیس ءُ رینجرز ءَ جست بہ کنت ھردوکیں نودربر پانزدہ روچ ءِ گوزگ ءَ پد ھم ھچ آمیدگس ءَ پیش کنگ پرچا نہ بیتگ اَنت؟ –

دومی نیمگ ءَ پسنی ءِ جھمنندیں بیگواھیں ورناہ ءِ کھول ءِ گوشگ اِنت کہ پسنی ببر شور بازار ءِ جھمنندیں ورنا معراج اسلم ء مھمد اسلم یک جون دوھزر ءُ بیست ءُ سَے ءَ کراچی ءِ دمگ کلفٹن ءَ زورانسری آوار جنگ ءَ پد بیگواہ کنگ بیتگ –

دمگی مردمانی رد ءَ معراج اسلم آپٹک انسٹی ٹویٹ آف ٹیکنالوجی کراچی ءِ نودربرے ءُ ھمے وڑ گلشن اسٹوڈنٹس پلازہ کراچی ءَ جھمنند بیتگ-