بلوچ کلاسیکل گشندہ ملا کمالان ءِ زھگ منصور ھوت ءُ نزام الدین ء لال مھمد ایرانی آمیدگس ءَ چہ پاھو ءِ سزا ءَ چٹ اتگ ءُ مروچی یل بیتگ اَنت-
گیشیں اھوالانی رد ءَ منصور ھوت ء ملا کمالان ءُ نزام ء لال مھمد مروچی ما زاھدان ءِ مزنیں زندان ءَ زمانت ءِ سر ءَ یل کنگ بیتگ اَنت –
ھردوکانی سر ءَ ایرانی آمیدگس ءَ گوست ءَ زمین ءُ ڈیھ ءِ جاورانی ناگیگ کنگ ءِ پژدر ءَ پاھو دیگ ءِ ھکم داتگ بیتگ-
زانگ بہ بیت منصور ھوت گوستگیں سال ءِ دو اکتوبر ءُ نزام سِی ستمبر ءَ ماں چھبار ءَ بلوچ جنک ماھو بلوچ ءِ گون ءَ بیوکیں زوراکی ءِ ھلاپ ءَ بیوکیں زھرشانی ءِ وھد ءَ دزگیر کنگ بیتگ اَنت-
زانگ بہ بیت چریشی ءَ پیش ھژدہ سالی ئیں ورنا شعیب میر بلوچزئی ریکی، کمبیز خروت، ابراھیم ناروی ءُ منصور دھمردہ ھم ایرانی آمیدگس ءَ مرگ ءِ سزا دیگ ءِ ھکم داتگ ات اَنت ءُ چریشی ءَ ایرانی ایمنسٹی انٹرنیشنل ءَ اے ورنایانی مرگ ءِ سزا دیگ ءِ دارگ ءِ کڈنی کتگ ات –