بلیدہ: لیویز ءِ رھسری بنجل ءِ سر ءَ اُرش، سلاہ دستیگ، بنجل ماندارگ بیتگ

بلوچستان ءِ دمگ کیچ ءَ لیویز لشکر ءِ یک رھسری بنجلے ءِ سر ءَ ناشناسیں سلاہ بندیں مردماں اُرش کرتگ، بنجل اش مانداشتگ ءُ اُرشکاراں سلاہ دستیگ کتگ ءُ گون وت برتگ اَنت-

وئیل گوستگیں شپ ءَ پیش اتکگ، دمگی مردمانی رد ءَ سلاہ بندانی مزنیں کچے ءَ رھسری بنجل ءِ سر ءَ اُرش کرتگ ءُ کارندہ اش دزگیر کتگ اَنت – آیانی سلاھانی دستیگ کنگ ءَ پد آیانی بنجل اش مانداشتگ –

دمگی مردمانی رد ءَ اُرشکارانی کارندھاناں ھچ وڑ ءَ تاوانباری نہ کتگ ءُ پد ءَ یلو کتگ –

اُرش ءِ زمہ واری کس ءَ پہ وت ءَ نہ زرتگ –

دمگی مردمانی گوشگ اِنت اے بنجل گمانی رنگ ءَ سیمسر ءَ باپاری ءَ ھواریں گاڑیاں گیر کانونی رنگ ءَ زر گپتگ انت ئِے دمگی مردمانی گوشگ اِنت اے مردماں زر گپتگ ءُ دمگدارانی آفیسراں داتگ اَنت –

زانگ بہ بیت بلوچستان ءِ دمگ کیچ ءُ دگہ سیمسراں ھواریں جاھاں پاکستانی پوج ءُ دگہ لشکر سیمسراں باپاری تکاں ھواریں گاڑیاں پوڑی گرگ ءِ بھتام جنگ ءَ اَنت ھمے وڑ بازیں جاھان سرکاری پلامرزی کنوک ھم اے بنجل ءَ جاڑیگ اَنت –

سیمسرانی سر ءَ تیل ءُ دگہ باپاری کنوکیں گاڑیانی ٹوکن ءِ دروشم ءَ زانگ بیت اِنت – یک ٹوکنے ءِ نھاد شش لک ءَ بھا بیت اِنت – ھمے وڑ پاکستانی پوج ءِ آفیسر ءُ مزنیں مردم اے ٹوکناں بھا کنگ ءَ اَنت ءُ ایشانی سر ءَ پائدگ چست کتگ اَنت-

پاکستانی پوج ءَ ایشی ءَ پیش ھرنائی ءُ کش ءُ گوراں اشکر ءِ باپار ءَ ھواریں مردماں زر گرگ ءِ بھتام جنگ بوگ ءَ اَنت ایشی ءَ پیش اشکرانی گاڑی پھریزگ ءِ پوج یک ٹنے ءِ ھساب ءَ زر گرگ ءَ اَنت-