بلوچستان: جون شانوکیں سرڈگار
ٹی بی پی شونگال
بلوچستان ءِ پولیس ءِ کاونٹر ٹیررازم ڈیپارٹمنٹ ءَ 30 اگست 2021 ءَ ڈپٹی کمشنر ھزدار ءُ ڈپٹی کمشنر آواران ءَ یک نمدی یے دیم داتگ اَت، ایشی ءِ تہ ءَ گُشگ بیتگ اَت کہ ناصر فاروق ء غلام فاروق جھمنند صادق آباد زھری، غلام جان ءِ باران جھمنند بائی پاس شال، عبدالقیوم ءِ زھری خان جھمنند زھری ھزدار، کمال خان ءِ باھوٹ جھمنند چُکی آواران یک پولیس میڑئے ءِ تہ ءَ کُشگ بیتگ اَنت ءُ آ ناشرکار نامینگ بیتگ اَنت۔ کاونٹر ٹیررازم ڈیپارٹمنٹ ءَ گمانی پولیس میڑ ءِ تہ ءَ کُشگ بیتگیں بے وارس نامینتگ ءُ ایدھی ءِ کمک ءَ دشت تیرہ میل ءَ کل ءُ کسارت کُتگ اَنت۔
دشت تیرہ میل ءَ پجار نہ بیتگیں جونانی گورستان ءِ آبات اِنت۔ شال- سبی دگ ءِ سر ءَ برجاھیں گورستان ءِ تہ ءَ دو سد ءَ گیشتر گور اَنت، اے جون کوھی دمگ ءُ گیاباناں چہ بے وارسیں جاوراں دزکپتگ اَنت۔ بلوچ آجوئی تکانی گُشگ اِنت کہ اے دزکپتگیں جونانی تہ ءَ گیشتریں کچ چہ پیسر ءَ زورانسری بیگواھی ءِ آماچیں مردمانی اَنت کہ چہ ایشاں بازیں جون ژانگولیں جاورانی تہ ءَ نادراھجاہ ءَ آرگ بنت ءُ بازیں دروگیں میڑانی تہ ءَ کُشگ بیتگ اَنت۔
دو سال پیسر بے وارس نامینتگ ءُ کَڈ کُتگیں جون زورانسری بیگواھیں مردمانی اَنت، اے جونانی تہ ءَ چہ زھری ءَ زورانسری بیگواہ بیتگیں ناصر جان قمبرانی ءُ نومبر دو ھزار ءُ بیست ءَ چہ حب چوکی ءَ فرنٹیئر کور ءِ کارندھانی دست ءَ بیگواہ بیتگیں عبدالقیوم زھری ءِ نام چہ کھول ءَ پجار کُتگ ءُ وتی ھنداں کل ءُ کسارت کتگ اَنت۔
بیست ءُ یکمی کرن ءِ بندات ءَ چہ بلوچستان ءِ آجوئی ءِ جُنز ترندی ءَ گوں برجاہ اِنت ءُ بلوچ آجوئی ءِ جُنز ءِ راہ ءَ دارگ ءِ ھاتر ءَ زورانسری بیگواھیں مردمانی ٹپیگیں جونانی دروشم ءَ دزکپگ ءِ درچ 2008 ءَ بندات بیتگ اَت کہ داں انگت جتاھیں دروشماں برجاہ اِنت۔ پیپلز پارٹی ءُ مسلم لیگ ن ءِ اھداں ھزارانی کچ ءَ زورانسری بیگواھیں مردمانی جون جتاجتائیں دمگاں چہ ژانگولیں دروشماں دزکپتگ اَنت۔
عبدالقیوم زھری ءِ جِنک زنیرہ ءِ پئیمیں بازیں زھگ ھمے اوست ءَ نشتگ اَنت کہ آیانی بیگواھیں پِت یل بنت بلے آ جونانی دروشم ءَ بے نامیں مردمانی گورستان ءَ چہ دزکپگ ءَ اَنت۔
پاکستان ءِ واکداریں ادارگاں بلوچ نیشنلسٹ آرمی ءِ گمانی کماندار ءَ رسانکدر ءِ دیم ءَ آرتگ ءُ بلوچ جیڑہ ءِ گیوار کنگ ءِ ٹاہ دئیگ ءَ اَنت ءُ دومی نیمگ ءَ زنیرہ ءِ پئیمیں زھگاں چہ آیانی سرانی ساھگ پچ گِرگ بئیگ ءَ اَنت۔ زورانسری بیگواھیں مردمانی کُشگ ءَ چہ بلوچ آجوئی ءِ جُنز ءَ توانائی رس ایت ءُ لس مھلوک ءِ تہ ءَ برجاھیں زھر ءُ گم ءِ تہ ءَ گیشی کَئیت اِنت۔